Тиҙҙән футбол матчтары башлана

Шулай итеп, был сара бик үҙенсәлекле шарттарҙа үткә­реләсәк. “Өфө” клубы генераль директоры Шамил Ғәзизов ошо хаҡта: “Ҡыҙғанысҡа ҡаршы, миҙгелдә ҡаралған бар матчтар ҙа тамаша­сыларһыҙ уҙасаҡ. Уйын майҙанында футболсылар, тренерҙар штабы һәм киң мәғлүмәт саралары вәкилдәре генә буласаҡ. Яңы регла­ментҡа ярашлы, баш тренер бер матч буйына биш алмаштырыу хоҡуғын аласаҡ. Элекке йылдарҙағы кеүек, һуңғы урынға сыҡҡан ике клуб Премьер-лига менән хушла­шасаҡ, ә уларҙың урындарын Футбол милли лигаһының ике уйынсыһы биләйәсәк”, – тип белдергән “Башинформ” мәғ­лүмәт агентлығына.

Шулай итеп, был матчтарға әҙерлек башланды, тиһәк тә була. 18 майҙа “Өфө” футболсылары, тренерҙары һәм баш­ҡа хеҙмәткәрҙәр баш ҡала­быҙҙа йыйылды һәм коронавирус инфекцияһына анализ биргәйне. Бер кемдә лә COVID-19 табылмаған. Күнекмәләр бар санитар нормаларға ярашлы үткәреләсәк.

“Өфө” футбол клубының генераль директоры Шамил Ғәзизовтың һүҙҙәренә ҡара­ғанда, эшселәр иҫке япманы ала башлаған. Өҫтәүенә һауа шарттары ла бының өсөн ҡулайлы. Баш ҡалалағы стадион өсөн яңы япманы Италиянан килтергәндәр. Быға тиклем клуб етәкселеге, “Нефтсе”лә тәбиғи газон өсөн шарттар юҡ, тип белдергәйне.

Әйткәндәй, үҙеңде изоляциялау осорон футболсылар нисек үткәргән? “Өфө” футбол клубы ярымһаҡсыһы Оливье Тилль, тыуған яғында панде­мияға бәйле хәлдең бик хәүефле булыуы сәбәпле, был ваҡытта Люксембург ҡала­һына ҡайтмаған, Өфөлә ҡа­лыуҙы хуп күргән. Башҡорт командаһынан тағы ете уйынсы ауыр осорҙа Башҡорт­останда йәшәүҙе сәләмәтлек өсөн хәүефһеҙерәк тип тапҡан.

Команданың баш тренеры Вадим Евсеев күнекмәләр һәм уйындар туҡталып торған осорҙа лиганың төп спикерына әйләнгән. Ул социаль сел­тәрҙәге сәхифәһендә көйәр­мәндәр, спорт һөйөүселәр менән әүҙем аралашҡан.

Үҙеңде изоляциялау мәлен­дә күп кенә уйынсылар ҙа үҙҙәренең видеоблоктарын алып барған. Ә бына Вячеслав Кротов ҡатыны менән футбол ғаиләһе хаҡында бик ҡы­ҙыҡлы видео төшөргән. Ҡап­ҡасы Александр Белегов подъ­ездағы баҫҡыстарҙа күнек­мәләр эшләүе хаҡында бәйән иткән.

Ҡайһы бер легионерҙар тыуған яҡтарына ҡайтҡан һәм әле, сит илдәр менән сиктәрҙең бикләнеүе сәбәпле, Рәсәйгә кире килә алмаған. Хәтерегеҙгә төшөрәбеҙ: “Өфө”­лә Ловро Бизяк, Боян Йокич, Андреас Вомбергар (өсәүһе лә Словениянан), Джемал Табидзе (Грузия) һәм Йонуц Неделчару (Румыния) уйнай ине. Башҡорт командаһының баш­ҡа сит илдәрҙән уйынсылары Оливье Тилль (Люксембург), Остон Урунов (Үзбәкстан), Кэтэлин Карп (Молдавия) пандемия осоронда Өфөлә йәшәргә ҡалған. Уларға хәҙер илебеҙгә кире килеү өсөн ике юл бар: тәүгеһе барыһының да бергә Рәсәйгә юлланыуы булһа, икенсеһе – матчтар уларһыҙ үткәреләсәк һәм был футболсылар урынына йәш состав­тарҙан уйынсылар йәлеп ителәсәк. Әгәр улар Рәсәйгә кире килә алһа, ике аҙна изоляциялау осорон үтергә тейеш.

Рәсәй төбәктәрендә йәшәгән тренерҙар һәм футболсылар иһә Өфөгә ҡайта башланы. Мәҫәлән, спорт һөйөүселәргә киң билдәле һөжүм итеүсе Вячеслав Кротов Ҡырымдан баш ҡалабыҙға автомобилдә кил­гән. Юл ыңғайы ул Кубандәге Славянскиҙан ярымһаҡсы Николай Гиоргобианиҙы маши­на­һына ултыртҡан. Ә Дондағы Ростовта форвард Гамид Агаларовты үҙҙәре менән бергә алғандар.

Һамар ҡалаһында иһә уларҙы футболсы Кирилл Фольмер көтөп торған. Шулай итеп, яратҡан командабыҙ уйынсылары 2700 километр юлды йоҡламайынса 30 сәғәттә үткән, тип хәбәр итә “Өфө” клубының матбуғат хеҙмәте.

Баш тренер Вадим Евсеев та Мәскәүҙән Өфөгә үҙенең еңел машинаһында килгән. Шулай итеп, ул 14 сәғәт ваҡытын рулдә үткәргән. Социаль селтәрҙә тренер үҙенең хис-тойғоһо хаҡында яҙған: “Әйтерһең дә, баш ҡалабыҙҙан бер ҡайҙа ла китмәгәнмен”, – тигән ул.

Әйткәндәй, көйәр­мәндәр­ҙең һәм спорт һөйөүселәрҙең, әлбиттә, уйындарҙың нисек үтеүен күргеһе килә. Ә улар­ҙың барышы менән таныштырыу хоҡуғына “Матч ТВ” каналы ғына эйә. Ошондай осраҡта “Өфө” футбол клу­бының, был хоҡуҡтарҙы һа­тып алып, Башҡортостан юлдаш телевидениеһы һәм ра­диотапшырыуҙар ком­пания­­һына тапшырғаны бар. Ко­манда етәкселеге ошондай тәҡдим менән “Матч-ТВ” каналына сыҡ­маҡсы. Был кө­йәрмәндәрҙең һәм спорт һөйөү­селәрҙең яратҡан командаһының уйындарын ҡарай алһын өсөн эшләнә.