Элекке уйындар тергеҙелә

Сара Бөтә донъя башҡорт­тары ҡоролтайының Белорет, Учалы, Әбйәлил, Бөрйән райондары, Сибай, Магнитогорск, Межгорье ҡалалары хаки­миәттәре һәм ижтимағи ойошмалары ҡатнашлығындағы күсмә кәңәшмә сиктәрендә ойошторолдо.

“Ауҙарыш” – һыбайлы килеш армрестлинг ул. Был уйынды, нигеҙҙә, Башҡортостандың тау райондарында йәшәгәндәр уйнаған”, – тине республиканың мәҙәниәт министры урынбаҫары Рәнис Алтынбаев.

“Ауҙарыш” шарттары буйынса уйында ике йәки унан да күберәк һыбайлы ҡатнаша. Уның барышында ҡаршы яҡтар бер-береһен аттан һөйрәтеп төшөрөргә тырыша. Иң мөһиме – эйәрҙә ныҡ ултырыу, атҡа идара итеү һәм йығылып төшмәү. Ошо шарттар үтәл­гәндә еңеүгә өмөт итергә мөмкин.

Ҡоролтайҙың маҡсаты – был проектты киңәйтеү һәм спорт­сыларҙы әҙерләү. “Ҡасандыр башҡорттар өсөн һыбай йөрөү, уҡтан атыу, ҡаршы яҡтағы кешене аттан төшөрөү ғәҙәти хәл булған. Хәҙер улар спорттың этник төрҙәре кеүек ҡайтанан тергеҙелә, – ти Бөтә донъя башҡорттары ҡоролтайының президиум рәйесе Эльвира Айытҡолова. – Ярыштарҙы ҡараныҡ, улар һоҡланырлыҡ! Проектты киңәйтеү һәм спортсылар әҙерләү пландары бар. Район ҡоролтайҙары рәйестәре менән милли йолаларҙы, туған телде, мәҙәниәтте һаҡлау хаҡында һөйләштек”.