“Беҙҙең өсөн ат – ышаныслы дуҫ һәм яуҙаш”

Турнирҙың финалына Баш­ҡорт­остан Башлығы Радий Хәбиров та килде. Ярыш башланғанға тиклем ул ипподром алдында райондар ойош­торған күргәҙмә менән танышты. Тө­бәк Башлығы Шишмә районында йылҡысылыҡ өсөн кәрәк-яраҡ етеш­терә башлаған “Агроснаб” яуаплы­лығы сикләнгән йәмғиәте вәкилдәре менән аралашты, уларҙы “Ауыл сә­ғәте”нә саҡырҙы. Республика етәксеһе әйтеүенсә, предприятиены артабан үҫтереү мөмкинлеген ҡарарға, дәүләт ярҙамы күрһәтеү алымдары буйынса фекер алышырға кәрәк.

Сараны асыу тантанаһындағы сығышында Радий Хәбиров спорт­сыларға уңыштар теләне.

– Ҡәҙерле дуҫтар, хөрмәтле ҡу­наҡтар һәм спортсылар! Барығыҙҙы ла ошондай матур көн – ат бәйгеһе финалы менән ихлас ҡотлайым һәм спортсыларға еңеү һәм уңыштар теләйем, – тине ул. – Башҡортостан халҡы өсөн ат ғәйәт ҙур әһәмиәткә эйә. Ул быуаттар буйы беҙгә тоғро дуҫ һәм иптәш, атай-олатайҙар өсөн яуҙаш булды. Беҙҙең “Төньяҡ амур­ҙары”быҙ һәм генерал Шайморатов етәкселегендәге Башҡорт кавалерия дивизияһы яугирҙәре үҙҙәренең тоғро дуҫы менән бөтә Европаны гиҙҙе. Бөгөн спортсыларға ғәҙел һәм күркәм еңеү теләйем.

Был көндә ипподромға килгәндәр Башҡортостан Башлығы призына мауыҡтырғыс ярышҡа шаһит булды. Унда “Реактивити” ҡушаматлы аты менән беренсе категориялы жокей Александр Лиханов еңеп сыҡты. Спортсы, тренер Флүр Батыровҡа һәм Туймазы районынан “Реактивити”ҙың хужаһы Радик Гәрәевкә төбәк Башлығының төп бүләге һәм 250 мең һумлыҡ сертификат тапшырылды.

“Терра Башҡортостан” турнирында быйыл Шишмәнән 15 йәшлек Айгөл Моратова еңеү яуланы. Ярымфиналда ҡыҙ “Бүләк” ҡушаматлы атта, ә финалда “Алым” атында финишҡа беренсе булып килде. Жокей турнирҙа былтыр ҙа ҡатнашҡан, тик финалға етә алмаған.

Сара барышында Башҡортостан Башлығы тренерҙар, аграрийҙар, эшҡыуарҙар менән спорт йылҡысы­лығын үҫтереү мәсьәләләрен тик­шерҙе.

– Республикала ат спорты төрлө этаптарҙы үтте. Әле энтузиастарҙың тырышлығы менән ул ярайһы уҡ уңышлы үҫә. Спортсыларыбыҙ һәм хужалыҡ вәкилдәре Рәсәй турнир­ҙарында алдынғы урындарҙы яулай. Был йүнәлешкә һис шикһеҙ ярҙам күрһәтергә кәрәк, – тине республика Башлығы. – Башҡортостанда продуктив йылҡысылыҡты үҫтереүгә ярҙам программаларын төҙөйбөҙ. Күптән түгел Баймаҡта йылҡысылар менән осраштыҡ. Спорт йылҡысылығына килгәндә, “Аҡбуҙат” ипподромында һынау үҙәге асырға ҡарар иттек. Сабыштар тамамланғас, ремонт яһап, объектты тәртипкә килтерәсәкбеҙ. 2021 йылға тиклем спорт йылҡы­сылығын үҫтереү программаһын ҡабул итеп, бюджеттан аҡса йүнәл­тәбеҙ, бизнесты йәлеп итәбеҙ.

Мәғлүм булыуынса, “Терра Баш­ҡортостан” республика ат спорты турниры төбәктәге 54 район араһында былтырҙан башлап уҙғарыла. Уның маҡсаты – йылҡысылыҡты үҫтереүҙе дәртләндереү, тоҡомло башҡорт атын танытыу, тамашасыларҙы ат ярышына йәлеп итеү.