Әлшәйҙәр сәләмәт тормош яҡлы

Башҡортостанда балалар­ҙың, йәштәрҙең, өлкәндәрҙең, ғөмүмән, теләге бар һәр кем­дең спорт менән шөғөллә­неүе өсөн шарттар булдырыла. Республика ҡалала­рындағы һәм райондарын­дағы уңайлы физкультура-һауыҡтырыу комплекстарында, бассейндарҙа, көрәш зал­дарында, футбол һәм хоккей майҙансыҡтарында буш ва­ҡытты үҙ файҙаңа – сәлә­мәтлекте нығытыу өсөн – үткәрергә мөмкин.

Әлшәй районында ла сә­ләмәт тормош алып барырға теләгәндәр бихисап. Улар өсөн Раевка ауылындағы гимназия биләмәһендә төрлө спорт ҡорамалдары менән йыһазландырылған махсус майҙансыҡ барлыҡҡа килгән. Районда ике миллион һумдан ашыу аҡсаға спорт-технологик ҡоролма һатып алынған. Был майҙансыҡтың барлыҡҡа килеүе ошонда йәшәгән кешеләргә спортҡа ылығыу һәм сәләмәтлекте нығытыу өсөн киңерәк мөмкинлектәр асасаҡ. Әйткәндәй, был май­ҙансыҡ спорт менән шөғөл­ләнеү генә түгел, шулай уҡ халыҡҡа “Хеҙмәткә һәм обо­ронаға әҙер” Бөтә Рәсәй физкультура-һауыҡ­тырыу яраҡ­лылығы буйынса тест үткәреү өсөн дә тәғәйенләнгән.

Өҫтәүенә, Раевкала былтыр бына тигән яңылыҡ теркәлде: районда беренсе бассейнлы спорт комплексы асылды.

Комплекс “Башҡортос­тандың 100 йыллығына – 100 объект” проектына ярашлы төҙөлгән. Ул барлыҡ талап­тарға ярашлы итеп сафҡа индерелгән. 25 метрлыҡ бассейнда дүрт йөҙөү юлы бар. Бынан тыш, 45-кә 25 метрлыҡ спорт залы ла урынлашҡан. Унда баскетбол, волейбол, гандбол һәм мини-футбол менән шөғөлләнергә мөмкин. Ярҙамсы барлыҡ биналар ҙа күҙ уңында тотоп эшләнгән: сисенеү, душ бүлмәләре. Һыуҙы таҙартыуҙың заманса системаһы ҡуйылған. Спорт комплексының дөйөм майҙаны – өс мең квадрат метрҙан ашыу.

Яңы спорт комплексы барлыҡ заман талаптарына яуап бирә. Бында һаулыҡ мөмкинлектәре сикләнгән кешеләр ҙә шөғөлләнә ала. Улар өсөн бассейнда күтәреү механизмы бар, ингән урын­дарға пандустар ҡуйылған.

Күптән түгел ошо спорт комплексында һәм Раевка ауылындағы балалар һәм үҫмерҙәр спорт мәктәбендә Башҡортостан Республикаһы XXIX Ауыл спорт уйында­рының волейбол буйынса ярыштары ойошторолдо. Унда Әлшәй, Бишбүләк, Бүздәк, Йәрмәкәй һәм Шишмә райондарының ҡатын-ҡыҙҙар һәм ир-егеттәр командалары ҡатнашты. Сараны Әлшәй район хакимиәтенең Спорт һәм йәштәр сәйәсәте буйынса комитеты, район мәғариф бүлеге һәм Раевка ауылын­дағы балалар һәм үҫмерҙәр спорт мәктәбе ойошторҙо. Һөҙөмтәлә Әлшәй районы­ның ҡатын-ҡыҙҙар һәм ир-егеттәр йыйылма командалары беренсе һәм икенсе урын яуланы.

“Демография” милли про­ек­тының “Спорт – йәшәү нормаһы” федераль проекты сиктәрендә Раевка ауылында Тест биреү үҙәге тарафынан “ГТО” Бөтә Рәсәй физкультура-спорт комплексы сиктә­рендә райондың дөйөм белем биреү ойошмалары һәм предприятиелар араһында саңғы ярыштары буйынса нормативтарҙы тапшырыу ойошторолдо. Шуныһы үҙен­сәлекле: был сарала 6 йәштән 63-кә тиклемгеләр ҡатнашты.

Әлшәй районында волейбол буйынса XXIX Баш­ҡорт­остан Республикаһы Ауыл спорты уйындарының төбәк ярыштары үткәрелде. Унда Әлшәй, Бишбүләк, Бүздәк, Йәрмәкәй һәм Шишмә райондарынан биш йыйылма команда үҙ көсөн һынаны. Сараны Әлшәй районы хаки­миәтенең спорт һәм йәштәр сәйәсәте буйынса комитеты, райондың мәғариф бүлеге, балалар һәм үҫмерҙәр спорт мәктәбе ойошторҙо.

Әлшәй районы.