Әхәт Мортазин иҫтәлегенә турнир башлана

Бөгөн Өфө ҡалаһының “Динамо” стадионында Башҡортостандың халыҡ артисы, башҡорт дикторы Әхәт Мортазиндың иҫтәлегенә республикабыҙҙың киң мәғлүмәт саралары араһында волейбол буйынса ярыш уҙғарыла.

– Әхәт Мортазинды универсал диктор тип беләбеҙ, әйтеүҙәренсә, ул яңылыҡтарҙы бер ниндәй әҙерлекһеҙ уҡыған, тапшырыуҙарҙы юғары кимәлдә алып барған, – тип һөйләй Башҡортостан Журналистар союзы рәйесе, “Башҡортостан” гәзитенең баш мөхәррире Вәдүт Исхаҡов. – Башҡортостандарҙың һәм республикабыҙҙан ситтә ғүмер кисергән яҡташтарыбыҙҙың һәр иртәһе “Өфө һөйләй...” тигән һүҙҙәр менән башлана торғайны. Оҫтаның яғымлы тауышы һәр йортҡа ғына түгел, ә һәр кешенең күңеленә үтеп ингәйне.

Киң мәғлүмәт саралары коллективтарынан бер нисә волейбол командаһы төҙөлгән. Журналистар һәр йәһәттән дә алдынғы булырға тейеш, спортта ла һынатмаҫтарына шик юҡ.

Фото: Илдар Аҡъюлов.