Ял хаҡының яртыһы кире ҡайтарыла

Кәңәшмәлә балаларҙың ялын һәм сәләмәтләндереүҙе ойоштороуҙа путевка хаҡының бер өлөшөн ҡайтарыу программаһын тормошҡа ашырыу мәсьәләләрен тикшерҙеләр.

25 майҙа илебеҙҙә балаларҙың турист кешбэгы программаһы ғәмәлгә инде. Уны Рәсәйҙең Туризм буйынса федераль агентлығы тормошҡа ашыра. Ошо мәлдән алып һәр теләгән кеше балалар лагерҙарына путевка хаҡының бер өлөшөн ҡайтара ала. Атап әйткәндә, һүҙ 50 процентҡа тиклемге өлөш хаҡында бара, әммә ҡайтарылған сумма 20 мең һумдан артмаҫҡа тейеш. Хаҡты түләгәс, биш көн эсендә аҡса автоматик рәүештә түләгән картаға кире ҡайтарыласаҡ. Төп шарт: путевка фәҡәт мирпутешествий.рф. сайтындағы махсус программала теркәлгән “Мир” картаһы аша түләнергә тейеш.

Ойоштороусылар әйтеүенсә, бер балаға сәйәхәттәр һаны сикләнмәгән. Ғаиләлә бер нисә бала бар икән, һәр береһе өсөн путевка хаҡының яртыһына тиклем ҡайтарып буласаҡ.

Программала дәүләт һәм коммерцияға ҡараған стационар балалар ялы лагерҙары ҡатнаша. Ял учреждениелары, туроператор һәм путевка менән сауҙа иткән агрегаторҙар исемлеге мирпутешествий.рф сайтында бирелгән.

Андрей Назаров Башҡортостанда программала 58 балалар лагеры ҡатнашыуы ихтимал тип белдерҙе. Әлеге ваҡытта федераль реестрға уларҙың 22-һе ингән. Ҡалғандары 5 июнгә тиклем керәсәк тип көтөлә.

"Беҙҙең өсөн иң төп, мөһим мәсьәләләрҙең береһе – Башҡортостанда балалар ялын уңайлы, асыҡ итеү. Был федераль программа ошо ғәмәлдә бик яҡшы этәргес булып тора. “Кешбэк”ка мөмкин тиклем күберәк ҡала яны лагерҙарын индереү һәм күберәк балаларға ял итеү мөмкинлеген биреү зарур", - тине Андрей Назаров.

Мәғлүм булыуынса, “Балалар кешбэгы” программаһы 25 майҙа ғәмәлгә инеүенә ҡарамаҫтан, Рәсәй Хөкүмәте путевканы был көндән алдараҡ һатып алған ата-әсәләргә лә ҡайтарырға ҡарар иткән. Видеоконференция тамамланғас, Дмитрий Чернышенко барлыҡ төбәктәргә лә ошо мәсьәләне хәл итергә ҡушты. Варианттар өс көн эсендә тәҡдим ителергә тейеш.

Сығанаҡ: https://pravitelstvorb.ru/ru/press-office/news.php?ELEMENT_ID=51666

Фото: pravitelstvorb.ru