Ҡыҙҙарыбыҙ хатта һауаны яулай!

Башҡортостандың парашют спорты вәкиле Евгения Торгашева беренсе тапҡыр Рәсәй чемпионатының иң “йәш” төрҙәренең береһе һаналған тиҙлекле осоу  буйынса награда яуланы.

Парашют – боронғо спорт төрҙәренең береһе.  Тиҙлекле осоу төрө донъяла әллә ҡасан барлыҡҡа килһә лә, беҙҙең илдә уның менән күптән түгел генә ныҡлап шөғөлләнә башлағандар. Спортсылар билдәләүенсә, бында 4 мең метр бейеклектән һикерергә түгел, вертикаль рәүештә, аҫҡа ҡарай тура осорға кәрәк. Ә тиҙлек спортсының каскаһына ҡуйылған  махсус прибор ярҙамында үлсәнә, шуға күрә ергә төшкәс тә, был баш кейемен судьялар коллегияһына һөҙөмтәне баһалауҙары өсөн  тапшырырға тейешһең. Ярыш “Пущино” аэродромында үткәрелде. Башҡортостан исеменән тағы Артем Боровик сығыш яһаны. Евгения Торгашева иһә өсөнсө урынды яуланы. Беренсе урынға Псков ҡалаһынан Елена Лактионова сыҡһа, икенсе урын Кемерово өлкәһенән Анастасия Игнатоваға бирелде.

Айһылыу НИЗАМОВА.