“Спортсылар ғына түгел, лайыҡлы кешеләр үҫтерәбеҙ”

Спорт көрәше менән шөғөлләнеү сәләмәтлекте нығытыуға һәм физик үҫешкә бик яҡшы йоғонто яһай. Ул көслө, етеҙ, аныҡ, сабыр, маҡсатлы, йылдам булырға ярҙам итә. Шуға спорт көрәше – физик тәрбиәнең мөһим өлөшө ул. Уның дөйөм белем биреү мәктәптәренең физик культура буйынса программаһына индерелеүе лә тиккә түгел.

Хәҙерге спорт көрәше грэпплинг, грэпплинг-ги, ирекле көрәш, ҡатын-ҡыҙҙар көрәше, грек-рим көрәше кеүек төрҙәргә бүленә. Ирекле көрәш, ҡатын-ҡыҙҙар көрәше, грек-рим көрәше кеүек төрҙәре Олимпия уйындары программаһына ла индерелгән.

Тиҙҙән, 11 – 23 августа, Башҡортостандың баш ҡалаһында 21 йәшкә тиклемге юниорҙар араһында спорт көрәше буйынса донъя беренселеге ойоштороласаҡ. Шуның менән бәйле Александр Николаевич Григорьевҡа мөрәжәғәт иттек. Ул – Башҡортостандың Спорт көрәше буйынса Олимпия резервы мәктәбе директоры, республиканың мәғариф отличнигы, Башҡортостан Республи­каһының Почет грамотаһы эйәһе, СССР-ҙың классик көрәш буйынса спорт мастеры. Былтыр Александр Григорьев Халыҡтар дуҫлығы ордены менән бүләкләнгәйне.

Башҡортостан Башлығы приздарына спорт (грек-рим) көрәше буйынса шәхси һәм команда иҫәбендә Рәсәй кубогына ярыштарҙы асҡан ваҡытта ошо орденды алып: “Һәр тренер юғары кимәлдәге спортсыны ғына түгел, бөйөк Рәсәйҙең лайыҡлы гражданын да тәрбиә­ләү хаҡында хыяллана. Үҙ тәр­биәләнеүсем менән ғорурланам. Ул – Башҡортостан Рес­публикаһының лайыҡлы улы”, – тип белдергәйне Александр Григорьев.

– Өфө мәҙәниәт кенә түгел, спорт буйынса ла иғтибар үҙәгендә ҡала. Тиҙҙән Башҡортостанда ғына түгел, Рәсәйҙә беренсе тапҡыр спорт көрәше буйынса юниорҙар араһында беренселек үткәреләсәк. Унда донъялағы 60-тан ашыу илдән 1 мең 500-ҙән ашыу спортсы ҡатнашасаҡ, – тине беҙгә Александр Николаевич. – Көрәш – алдан әйтеп, күҙаллап булмаған спорт төрө. Барыһы ла ул ваҡыттағы хәл-ваҡиғаға бәйле буласаҡ, уңыш та кәрәк.

Әйткәндәй, Александр Григорьев Стәрлетамаҡ районының Григорьевка ауылында тыуған, Ҡаҙағстанда үҫкән.

– Александр Суворов дисциплинаның һәр еңеүҙең “әсәһе” булыуы хаҡында белдергән. Көрәш тәртипкә, үҙаллылыҡҡа өйрәтә. Балалар менән алты, ете, һигеҙ йәштән эшләйбеҙ, күнекмәләр үткәрәбеҙ, – тип һөйләй Александр Николаевич.

Тиҙҙән башланасаҡ донъя чемпионатына тиклем дә яҡташ спортсыларыбыҙ призлы урындар яулағайны. Мәҫәлән, 2019 йылда Ислам Опиев һәм Фәдис Вәлитов 23 йәшкә тиклемгеләр араһында грек-рим көрәше буйынса донъя беренселегендә триумфатор булды. Будапештта Ислам Опиев 77 килограмға тиклем ауырлыҡ үлсәмендә алтын миҙал яулаһа, Баш­ҡортостандан икенсе вәкил Фәдис Вәлитов бронза миҙалға өлгәште.

– Барлыҡ йәш категориялары буйынса ла призлы урындар яулағандар бар, – тине Александр Григорьев. – Тағы булыр тигән өмөттәбеҙ.

Рәсәйҙең грек-рим көрәше буйынса юниорҙар командаһы Алуштала уҡыу-күнекмә йыйындарын тамамланы. Илдең йыйылма командаһы составында Башҡортостандан көрәшселәр Адлан һәм Алан Амриевтар, Сәйед-Хөсәйен Бакаев, Эрик Шамилов, шулай уҡ өлкән тренер Геннадий Сырцев бар ине.

Башҡортостандан Рәсәйҙең йыйылма командаһына кандидаттар Адлан Амриев һәм Сәйед-Хөсәйен Бакаев Өфөләге күнекмәләрҙе дауам итә.

- Айһылыу НИЗАМОВА.