Бал байрамында 160-тан ашыу умартасы ҡатнашты

Ғафури районының Красноусол ауылы эргәһендә “Бал байрамы” республика башҡорт балы байрамы үтте. Ойоштороусылар белдереүенсә, фестиваль этнографик туризмды үҫтереүгә йүнәлтелгән.  

Сараны Башҡортостандың Халыҡтар дуҫлығы йорто, республика Халыҡтар ассамблеяһы һәм “Сәйетбаба” тарихи-мәҙәни үҙәге менән берлектә “Башҡортостандың күп төҫлөлөгө” – 2021” этнотурфесы – этнотуристик тәжрибәһе төбәк-ара фестивале” Рәсәй Федерацияһы Президенты гранты проекты сиктәрендә ойошторолдо.

Фестиваль сиктәрендә Ғафури районы туристарҙы һәм республика ҡунаҡтарын ихлас ҡаршыланы. Хөрмәтле ҡунаҡтар араһында Башҡортостан менән Германияның Баден-Вюртемберг федераль ере халыҡтары араһында мәҙәни бәйләнештәрҙе нығытыусы “Өфө – Бодензее дуҫлыҡ күпере” йәмәғәте вәкилдәренең яуап итеп килеүе айырыуса ҡыуаныслы ваҡиға булды.

Сараны асыу тантанаһында Ғафури районы хакимиәте башлығы Фәнзил Сынғыҙов һәм район Советы рәйесе Фаил Зәйнетдинов тәбрикләне. Район Мәҙәниәт йорто сараны йыр-моң менән биҙәне.  

“Сәйетбаба” башҡорт тарихи-мәҙәни үҙәге ҡурай һәм башҡорт биҙәүестәрен әҙерләү буйынса оҫталыҡ дәрестәре ойошторҙо.

Ғафури районы – экологик яҡтан таҙа, үҙенсәлекле тәбиғәте булған, туристар араһында танылыу алған, башҡорт умартасыларының ысын терәге булған төбәк. Фәнзил Фәиз улы үҙенең  сығышында белдереүенсә, районда умартасылыҡ йылдам үҫешә.

Байрамдың төп ваҡиғаһы – бал йәрминкәһе булды. Барлыҡ республиканан 160-тан ашыу умартасы алып килгән йүкә, ҡарабойҙай, сәскә һәм башҡа төр шифалы тәмле татлыҡты тәмләү мөмкинлеге булды. Улар Башҡортостандың Халыҡтар дуҫлығы йорто филиалдары исеменән килгәйне. Бындай филиалдар һаны 26, һәм уларҙың күпселегенең белгестәре “Бал байрамы” йәрминкәһендә ҡатнашты. Байрамдың төп биҙәге бал булһа, шулай уҡ оҫталар эшләгән, тарихи һәм көнкүреш әйберҙәре иғтибарҙы йәлеп итте.  

Барлыҡ ҡунаҡтар был фестивалдәрҙе ойоштороу туристарҙы йәлеп итеүгә булышлыҡ итәсәген, урындағы халыҡтың мәҙәниәте менән таныштырыуға юл асыуын билдәләне.

“Өфө – Бодензее дуҫлыҡ күпере” йәмәғәте рәйестәше Надя Винтермайер һәм йәмғиәт ағзаһы Юрген Редлер бал алыу серҙәренә һәм тарихи әйберҙәргә айырыуса иғтибар итте. “Сәйетбаба” тарихи-мәҙәни үҙәк хеҙмәткәрҙәре был йәһәттән уларға бар яҡлап та ярҙам итте, гид булып сығыш яһаны.

“Бал байрамы” фестивале ҡунаҡтары араһында республика ЮХХДИ идаралығының элекке начальнигы Динар Ғилметдинов та бар ине. Ул район аша үтеп барғанда бал байрамы тураһында ишетеп, туҡталырға булған.  

Байрамда быйыл мартта башланған Туризм, тирә-яҡты өйрәнеү һәм экскурсиялар республика балалар һауыҡтырыу-белем биреү үҙәге семинары сиктәрендә ойошторолған Этнотурфесты ябыу сараһы үтте һәм уның еңеүселәрен тәбрикләнеләр. Мәҫәлән, “Никольский храм” тарихи-мәҙәни үҙәк хеҙмәткәрҙәре “Иң хаҡлы экскурсовод” номинацияһында еңеүгә өлгәште.

Байрам аҙағында туристар ҡатнашлығында уҙғарылған “Сылбыр” башҡорт аулыҡ өйөндә ҡатнашты.

Сара спорт уйындарына бай булды. Унда арҡан тартыу, уҡтан атыу кеүек бәйгеләр ҙә ойошторолдо. Сәхнәлә Ғафури районының һәүәҫкәр артистары сығыш яһаны. Район китапханаһы хеҙмәткәрҙәре “Фитобар” ойошторҙо. Китапханасылар ҡунаҡтарҙы район болондарында үҫкән шифалы үләндәр менән таныштырҙы. Улар өсөн йүкә, бөтнөк, мәтрүшкә һәм башҡа үләндәрҙән сәй әҙерләгәндәр.

Фото: рәсми сығанаҡтарҙан.