Көрәшсе булырға теләгән балалар күбәйә

“Өфөлә йәш үҫмерҙәр араһында Спорт көрәше буйынса донъя беренселеге үткәндән һуң көрәш секцияһына килергә теләк белдереүселәр артты”, - тип билдәләне халыҡ-ара класлы спорт мастеры, Рәсәйҙең атҡаҙанған тренеры, 24 йәшкә тиклемге Башҡортостан йыйылма командаһының һәм грек-рим көрәше буйынса республика өлкәндәр командаһының өлкән тренеры, йәш үҫмерҙәр араһында донъя чемпионы әҙерләгән спортсы Рәмил Сираев.

“Беҙгә ата-әсәһе менән бергә бәләкәй балалар килеп, секцияларға яҙыла башланы. Грек-рим көрәше – барлыҡ көрәш төрҙәренең нигеҙе. Уны үҙләштергән спортсылар грэпплингҡа ла, ҡатнаш көрәш сәнғәте төрҙәренә лә күсә ала, - тип билдәләне Рәмил Сираев “Башинформ” агентлығына биргән әңгәмәһендә. - Ғөмүмән, шуны әйткем килә: Башҡортостанда спорт үҫешә. Гимнастика комплексы төҙөлә, Шорт-трек үҙәге әле үк балаларҙы ҡабул итә. Беҙ Көрәш һарайын көтәбеҙ, сөнки залдар ысынлап етешмәй”.

Хәбәр итеүебеҙсә, республика Башлығы Радий Хәбиров “Матч ТВ” телеканалына Башҡортостанда спорттың үҫешенә, төбәгебеҙҙә үткән донъя кимәлендәге спорт ярыштарына арналған ҙур интервью бирҙе. Ошо әңгәмә барышында ул йәш үҫмерҙәр араһында Спорт көрәше буйынса донъя беренселегенән һуң спорт секцияларына балалар күпләп киләсәк, тип билдәләгәйне.

Фото: БР Спорт көрәше федерацияһы.