“Алда оло еңеүҙәр буласаҡ...”

Күптән түгел Өфөләге Рима Баталова исемендәге спорт әҙерлеге үҙәгендә йәш үҫмерҙәр араһында быйыл бокс буйынса иң яҡшы күрһәткестәргә өлгәшкән спортсыларҙы ҡотланылар.

Яҡшы ҡаҙаныштарға өлгәш­кән­дәргә “Башҡорт­остан Рес­пуб­ли­ка­һының күренекле спорт­сыһы” тигән маҡтаулы билдә, республиканың Спорт ми­нистрлығының Рәхмәт хаттары тапшырылды.

– Спортсыларға, тренер­ҙарға һәм республиканың Бокс буйынса федерацияһы ко­мандаһында булғандарҙың барыһына ла рәхмәт белдерәм. Һеҙҙең еңеүҙәрегеҙ Башҡорт­останда боксты һәм, дөйөм алғанда, спортты популярлаш­тырыуға тос өлөш индерә. Ҙурҙар спортында ла уңыштар теләйбеҙ! Алда оло еңеүҙәр буласағына ышанам, – тип белдерҙе Башҡортостандың спорт министры Руслан Хәбибов. 

Быйыл йәш үҫмерҙәр араһында бокс буйынса донъя чемпионаты, былтыр Европа буйынса беренселек еңеүсеһе Азалия Әминева, 2021 йылда ошо спорт төрө буйынса Европа һәм донъя ярыштарында беренселекте яулаған Иван Тихонов, быйыл донъя бе­ренселегендә алтын миҙал яулаған Мария Казакова һәм шулай уҡ ошо йылда Европа беренселегендә иң яҡшыһы тип танылған Савва Морозов  “Башҡортостандың күренекле спортсыһы” тигән маҡтаулы билдә менән бүләкләнде.

Октябрьский ҡалаһындағы 1-се спорт мәктәбенән тре­нерҙар  Александр Савкин, Павел Савейкин, Өфөләге Н. Валуев исемендәге бокс буйынса олимпия резервы спорт мәк­тәбе тренерҙары Флүрә Насирова һәм  Юрий Шокуров Спорт министрлығының Рәхмәт хаттарына лайыҡ булды.

Айһылыу НИЗАМОВА