Сәләмәт тормош алып барыуға ни етә!

Конфессия-ара һәм милләт-ара татыулыҡты нығытыу маҡсатында Өфөләге “Динамо” стадионында һәүәҫкәр командалар араһында волейбол буйынса Беренсе республика конфессия-ара турнир ойошторолдо.

Тәүге матч Йәһүдтәр ойошмаһы менән Баш­ҡортостан Диниә назараты командалары араһында үткәрелде. Уйындың беренсе партияһы – 21:13, икенсеһе 21:15 иҫәптәре менән – икеһе лә Диниә назараты файҙаһына булды. Һөҙөмтәлә дөйөм 2:0 иҫәбе менән мосолмандар командаһы еңде.

Турнирҙың маҡсаты төрлө диндәге милләттәр араһындағы татыулыҡты нығытыу һәм сәләмәт тормошто пропагандалау ине. Конфессиялар баш­лыҡ­тары Владыка Никон, Тәлғәт Тажетдин, Айнур Бир­ғә­лин, Дан Кричев­ский тәҡдимде ҡуш ҡуллап хуп­ланы. Көнө буйы барған ярыш кис кенә тамамланды.

Шулай итеп,  Башҡортостан Диниә назараты ко­мандаһы (А төркөмө) еңеү яуланы, икенсе урынды Өфө епархия коман­даһы алды, өсөнсө урынға Йәһүдтәр ойошмаһы командаһы сыҡты, ә дүртенсе урынды Башҡортостан Диниә назараты командаһы (Б төркөмө) яуланы. Уларҙы Башҡортостан Хөкүмәте Премьер-министры урынбаҫары Азат Бадранов бүләкләне.

Әлбиттә, турнирҙы күмәк тамашасылар ҡатнаш­лығында ҙурыраҡ итеп үткәреү уйы бар ине. Әлегә, коронавирусҡа бәйле, санитария-эпидемиология талаптарына ярашлы сикләүҙәр күҙәтелде.

Рәшит КӘЛИМУЛЛИН.