Бөтә яңылыҡтар
Спорт һәм туризм
4 Декабрь 2021, 15:06

Барыһы ла халыҡ сәләмәтлеге өсөн!

Фото:Асҡын районы хакимиәте.

Күптән түгел Асҡын ауылындағы “Батыр” физкультура-һауыҡтырыу комплексында тоҙ бүлмәһе эшләй башланы. Тантаналы сарала Асҡын райо­ны башлығы Динис Йосопов һәм Дәүләт Думаһы депутаты Ризуан Ҡорбанов ҡатнашты. Асҡын үҙәк район дауаханаһы баш табибының медицина буйынса урынбаҫары Роберт Шәрипов тоҙ бүлмәһенең нимә икәнлеге, уның файҙаһы, кеше организмына нисек тәьҫир итеүе, ниндәй ыңғай һәм кире яҡтары барлығы хаҡында һөйләне.

Тоҙ бүлмәһе – районда йәшәүселәргә тиҙ һәм тулы­һынса аяҡҡа баҫыу, сәлә­мәтлекте нығытыу һәм сир ҡатмарлыҡтарын иҫкәртеү өсөн шәп мөмкинлек. Был бүлмә “Реаль эштәр” про­грам­маһы буйынса ойош­торолған. Унда өлкәндәр ҙә, балалар ҙа һаулығын нығыта ала.

Әйткәндәй, Нефтекама өсөн дә матур яңылыҡтар теркәлде. Ҡалалағы спорт мәктәбе “Ford Transit” микроавтобусына эйә булды. 17 урынлыҡ яңы транспорт сараһы ҡалаға “Демография” милли проекты ярҙа­мында килтерелде. Хәҙер ул спорт мәктәбе автопаркында, башҡа ике автобус менән бер рәттән, үҙ урынын алды. Уларҙың берәү­һенең файҙаланыу ваҡыты үтеп бара, шулай итеп, ваҡы­тында алып килгәндәр.

– Был – бөгөн “Ford Tranzit” моделенең һуңғыла­рының береһе. Хәүефһеҙ­лек ҡайыштары менән тәь­мин ителгән. Тахограф, кондиционер, йылытыу сис­темаһы бар. Хәҙер балалар кәмендә аҙнаһына бер тапҡыр тиерлек  сығып йө­рөй аласаҡ. Уңайлы ла бу­ласаҡ. Етәкселек һүҙҙә­ренә ҡарағанда, үҙ автобус­тары­ның булыуы транспорт сы­ғымдарын кәметеү мөмкин­леген бирә, – тине Нефтекама ҡалаһы хакимиәтенең физик культура, спорт һәм туризм буйынса комитеты рәйесе Назар Шәйәхмәтов.

Айһылыу НИЗАМОВА