Байрамды еңеү менән ҡаршыланыҡ

1 декабрҙә Бөтә Рәсәй хоккей көнөн билдәләнек. Тап ошо байрам алдынан  “Салауат Юлаев” хоккейсылары “Адмирал” менән уйнаны. Хоккейсыларыбыҙ көйәрмәндәрҙе, спорт һөйөүселәрҙе тос еңеүе менән ҡыуандырҙы.

Әйткәндәй, “Адмирал” өсөн һуң­ғы ике матч уңышһыҙ булһа, “Салауат Юлаев”ҡа һуңғы дүрт уйын еңеү килтермәне. “Адмирал” етәк­селеге, үҙ командаһының хәлен яҡшыртам тип, Олег Горбенко урынына Леонид Тамбиевты баш тренер вазифаһын башҡарыусы тип ҡуйғайны. Тик был файҙа килтермәне.

Бөгөнгө матч, ысынлап та, еңел бул­маны. Ә юлаевсыларҙан Юха Метсола бик шәп уйын күрһәтте. Өфөләр икенсе осорҙа иҫәпте аса алды. Данил Башкиров менән Николай Кулемин “Адмирал” ҡапҡа­һына берәр шайба сәпәне. Һөҙөм­тәлә беҙҙең команда 2 : 0 иҫәбе менән еңеү яуланы.

Континенталь хоккей лигаһында “Адмирал”ға ҡаршы уйын һаҡсыбыҙ Филип Ларсен өсөн 350-се матч булды.

4 декабрҙә, “Салауат Юлаев” Континенталь хоккей лигаһына ярашлы, “Динамо” менән уйнаясаҡ.

Айһылыу НИЗАМОВА