Барыһы ла хоккей хаҡында

Быйыл илебеҙҙең Олимпия уйындарында ҡатнашасаҡ ҡатын-ҡыҙҙар һәм ир-егеттәр йыйылма командаһы составы раҫланды:

Башҡортостан исеменән һигеҙ спортсы сығыш яһаясаҡ.

Шулай итеп, Рәсәйҙең хоккей буйынса тренерҙар штабы Пекинда буласаҡ Олимпия уйындарында ҡатнашасаҡ уйынсылар исемлеген төҙөнө. Илдең хоккей буйынса ҡатын-ҡыҙҙар командаһына респуб­ли­кабыҙҙан ете спортсы ингән. Улар – Өфөләге “Ағиҙел” ко­мандаһы хоккейсылары, ҡап­ҡасы Мария Сорокина, һаҡ­сылар Мария Печникова, Анна Шибанова, һөжүм итеү­селәр Вероника Коржакова, Илона Маркова, Ольга Сосина, Полина Лучникова (запастағы уйынсы). Ә ир-егеттәр коман­даһы составында “Салауат Юлаев” хоккей клубынан Александр Кадейкин шулай уҡ запастағы уйынсы итеп һайлап алынған.

Әйткәндәй, күптән түгел Әлшәй районында республи­ка­лағы 2007–2008 йылғы йәш хоккейсыларҙан торған ауыл командалары араһында “Алтын шайба” финал ярыштары уҙғарылды. Сараны рес­публиканың Спорт, Мәғариф һәм фән министрлыҡтары, Башҡортостандың берләш­терелгән хоккей федера­цияһы, Башҡортостан буйынса А.В. Тарасов исемендәге “Алтын шайба” йәш хоккейсылар клубы Әлшәй районы хаки­миәте булышлығында ойош­торҙо. Ярыштарҙа Әлшәй, Әбйәлил, Балтас, Дыуан, Дүртөйлө, Кушнаренко, Өфө һәм Саҡмағош райондарынан һигеҙ команда көс һынашты.

Сараны ябыу тантана­һын­да Әлшәй районы хакимиәте башлығы Дамир Мостафин һәм Саҡмағош районы хакимиәте башлығы Реканс Ямалиев ҡатнашты. Улар йәш хоккейсыларҙы физик культура, спорт менән шөғөлләнергә һәм сәләмәт тормош алып барырға өндәне.

Бәйге еңеүсеһеҙ булмай. Республика ярыштарында беренселекте Саҡмағош районы командаһы яуланы, икенсе урынға Әлшәй командаһы сыҡты, өсөнсө урын иһә Дыуан районы хоккейсыларына бирелде. Еңеүсе командалар иҫтәлекле кубок менән бүләкләнһә, команда уйынсыларына миҙалдар һәм дипломдар, Әлшәй районы хакимиәтенең иҫтәлекле бүләктәре тапшырылды.

Республика финал ярыштарында еңеп сыҡҡан Саҡ­мағош районының “Барыҫтар” командаһы үҙ көсөн 2007-2008 йылғы йәш хоккейсыларҙан торған ауыл командалары араһында Бөтә Рәсәй “Алтын шайба” финал ярыштарында һынап ҡараясаҡ. Уларға уңыштар теләйбеҙ.

Айһылыу НИЗАМОВА