Комбинезон да еңеү яуларға ярҙам итә

Был исемдәрҙе хәтерҙә ҡалдырығыҙ: Ирма Махиня, Данил Садреев, Ирина Аввакумова һәм Евгений Климов. Көмөш миҙал – беҙҙекеләрҙә! Беренсе урында – Словения, өсөнсө урында – Канада спортсылары.

Шулай итеп, илебеҙ командаһы Олимпия уйындарында нормаль трамплиндан һикереү буйынса икенсе урынға сыҡты. Рәсәйҙең Трамплиндан һикереү һәм саңғы ике алышы буйынса федерацияһы вице-президенты Владимир Славский Рәсәй спортсылары уңыштары, уларҙың экипировкаһы судьяларҙа нисек дәғүә тыуҙырмауы хаҡында социаль селтәрҙә түбәндәгеләрҙе белдерҙе: “Был – сенсация. Әммә һәр сенсацияла законлылыҡ бар, һәм ул – был төр – беренсе тапҡыр Олимпия уйындарына индерелде. Беҙ ярты йыл элек тренерҙар составы менән миҙал өсөн көрәшә­сәгебеҙҙе асыҡланыҡ. Был – иҫәп, планлы әҙерлек алып барҙыҡ. Ко­ман­да Олимпия уйындарына һө­ҙөм­тә­ләрҙе яҡшыртты. Донъя кубок­тарында йыш ҡына комбинезон өсөн дисквалификациялайҙар ине, шуға Олимпия уйындары составына баш тренер Евгений Плехановтың ныҡ­лап һорауы буйынса комбинезондар буйынса белгесте лә индерҙек. Бынан тыш, ноябрҙә үк был һорауҙы FIS вәкиле менән оҫталыҡ класында ҡараныҡ. Ә артабан спортсылар үҙ ролен уйнаны”.

Шулай итеп, Япония, Германия һәм Австрия һикереүселәре – фавориттар – Олимпия уйындарында кейгән комбинезондарының норма­ларға тап килмәүе өсөн дисквалификацияланды. Ә был спорт төрө буйынса илебеҙ спортсылары 1968 йылдан алып миҙалға өлгәшә алмаған. Ул ваҡытта Владимир Белоусов ҙур трамплиндан һикереү буйынса иң яҡшыһы тип танылған. Шулай, спортта сенсация ла ярҙам итә, юғиһә ярыштар башында беҙҙе­келәр ниндәйҙер миҙал яулар тигән өмөт юҡ ине.

Әйткәндәй, миҙал хужаларының береһе Данил Садреев Стәрле­тамаҡ физик культура, идара итеү һәм сервис колледжында белем ала. Егет Татарстан Республикаһы өсөн сы­ғыш яһай. 18 йәшлек егеткә Пекин­дағы Ҡышҡы Олимпия уйындарында бәхет йылмайҙы: дүрт йыл­ға бер тапҡыр ойошторолған спорт са­ра­һында ул көмөш миҙал яуланы!

Айһылыу НИЗАМОВА