Сәпкә тура ата белеү – үҙе бер һөнәр

8 февралдә илебеҙ йыйылма командаһында республикабыҙ исеменән сығыш яһаған Эдуард Латипов ир-егеттәр араһында биатлон буйынса шәхси уҙыштарҙа үҙ көсөн һынаны. Уның менән бергә Александр Логинов, Кәрим Хәлили һәм Максим Цветков сығыш яһаны.

Биатлон шуны­һы менән үҙенсә­лекле: был спорт төрөндә ваҡытты әрәм итмәҫ өсөн сәпкә тура атыу та­лап ителә. Ҡыҙ­ға­нысҡа ҡаршы, илебеҙ спортсыларына был йә­һәттән уңыш йылмайманы. Ошо ярыштарҙа Франция Пекинда беренсе алтын миҙа­лын яуланы. Ә урындар түбәндәгесә:

1. Кантен Фийон Майе (Франция) – 2 яҙа атыу;
2. Антон Смольский (Беларусь) – 0 яҙа атыу, +14,8;
3. Йоханнес Бё (Норвегия)– 2 яҙа атыу, +31,1;
4. Максим Цветков (ROC) – 1 яҙа атыу, +34,9;
5. Александр Логинов (ROC) – 3 яҙа атыу, +1,40,2;
6. Эдуард Латипов (ROC) – 3 яҙа атыу, +2,25,7;
7. Кәрим Хәлили (ROC) – 4 яҙа атыу, +4,39,1.

Был уҙыштарҙа спортсыларыбыҙҙың миҙалдарҙы яулай алмауы кәйефте бер аҙ төшөрһә лә, әле быға өмөт бар әле, тигән уй күңелдә ҡалды. Әйткәндәй, 8 февралдә илебеҙ спортсылары өс бронза миҙалға лайыҡ булды. Рәсәй сноубордсыһы Вик Уайлд – параллель гигант слаломында, саңғысы Александр Терентьев – спринт уҙыштарында һәм Рәсәй санасыһы Татьяна Иванова шәхси ярыштарҙа өсөнсө урынға сыҡты.

12 февралдә Эдуард Латипов Александр Логинов, Максим Цветков һәм Даниил Серохвостов менән берлектә ир-егеттәр спринтында көс һынашасаҡ. Бәлки, ошо ярыштарҙа, ниһайәт, спортсыларыбыҙға уңыш йылмайыр?

Айһылыу НИЗАМОВА