“Был – планеталағы төп ярыштарҙағы бронза”

15 февралдә, Пекиндағы Ҡышҡы Олимпия уйындарында, республикабыҙ исеменән биатлонсы Эдуард Латипов сығыш яһаны. Үткән уҙыштарҙағы кеүек ул миҙал яулай алырмы? Бына ошо һорау борсоғайны беҙҙе.

Илебеҙ спортсылары баштан уҡ алтын миҙалға дәғүә итә ине. ROC командаһы өсөн Кәрим Хәлили, Александр Логинов, Максим Цветков һәм Эдуард Латипов тырышты. Һуңғы этапта тәүге урынға ла сыҡҡайнылар, беренселекте яулар­ҙар кеүек ине... Тик, ҡыҙғанысҡа ҡар­шы, дүртенсе булып ярышҡан Эдуард Латиповтың яҙа атыуы бар эште “боҙҙо”: алтын миҙалға өмөт ҡал­маны. Һөҙөмтәлә илебеҙ коман­даһы бронза миҙал яуланы. Бик үкенесле булды... Һөҙөмтәлә Норвегия ко­мандаһы – беренсе, Франция командаһы икенсе булып финишҡа килде.

Был көндө республика Башлығы Радий Хәбиров социаль селтәрҙәге сәхифәһендә түбәндәге яҙма менән уртаҡлашты: “Эйе, был – биатлон эстафетаһында бронза. Эйе, еңеүҙе ҡулдан ысҡындырыуҙары үкенесле. Әммә был – планеталағы төп ярыш­тарҙағы бронза. Һәм спортсы­ларыбыҙға – афарин, улар көрәште! Беҙҙең Эдуард Латиповты һәм Рәсәй йыйылма командаһы егеттәре Александр Логиновты, Максим Цветковты, Кәрим Хәли­лиҙе һәм уларҙың тренерҙарын ҡотлайым. Башҡа старттарҙа – уңыштар! Башҡортостан һеҙҙең менән!”

Шулай уҡ Башҡортостандың Республикаға идара итеү үҙәге социаль селтәрҙәге сәхифәһендә түбәндәгеләр хаҡында белдерҙе. “Барлыҡ эш туҡтаны, яҡшы, төшкө аш мәле. Олимпиада. Биатлон. Эстафета. Эйе, беҙ – өсөнсө! Әммә был – Олимпиадалағы бронза!!! Эдуард Латипов һәм барлыҡ егеттәр, афарин!!! Башҡортос­тандың Республикаға идара итеү үҙәге һеҙҙең менән, һәм беҙ быны еңелеү тип һанамайбыҙ!”

Республиканың спорт министры Руслан Хәбибов та социаль сел­тәрҙәге сәхифәһендә түбәндәгеләр хаҡында яҙҙы: “Эдуард – бөгөн үк Башҡортостандың спорт леген­да­һы. Биатлон тарихында бер спортсы ла төбәгебеҙ өсөн бер юлы өс миҙал яуламаны! Эдуард Латипов – Башҡортостандың спорт леген­даһы. Ул әле үк тарихҡа инде”.

Бөгөн Эдуард Латипов масс-стартта үҙен һынап ҡарай.

Айһылыу НИЗАМОВА