Уңыштар һиңә, "Салауат Юлаев"!

Бөгөн Өфөлә Башҡортостан Башлығы Радий Хәбиров “Салауат Юлаев” хоккей клубы уйынсылары һәм тренерҙар штабы менән осрашты.

Төбәк етәксеһе спортсыларға Континенталь хоккей лигаһының плей-офф уйындарында уңыштар, сағыу еңеүҙәр теләне.

Хәтерегеҙгә төшөрәбеҙ, Континенталь хоккей лигаһының даими чемпионаты йомғаҡтары буйынса, Өфө клубы Көнсығыш конференцияһының турнир таблицаһында өсөнсө урында тора.

– Йыл һайын плей-офф, барыбыҙ өсөн яуаплы осор, башланыр алдынан ошондай осрашыу үткәрәбеҙ, ул матур йолаға әүерелде, – тине Радий Хәбиров. – Һеҙ был этапҡа бик һәйбәт һөҙөмтәләр менән барҙығыҙ – “регулярка” йомғаҡтары буйынса өсөнсө урын. Дәғүәсегеҙ ябай түгел – “Себер”. Әммә барыһы ла килеп сығырға тейеш, тип уйлайым. Был уйындарҙы көйәрмәндәр, тамашасылар, бар ғаиләләр көтә. Һеҙҙең өсөн көйәсәкбеҙ!

Республика Башлығы Пекинда үткән ҡышҡы Олимпия уйындарында хоккей клубы уйынсыларының уңышлы сығыш яһағанын айырым билдәләне.

– Һеҙ яңы ғына Олимпиаданан ҡайттығыҙ. Кисә генә беҙ ошо сара еңеүселәрен ҡотланыҡ. Байрамға килгән балалар илебеҙ намыҫын яҡлаған спортсыларға ғорурлыҡ менән ҡараны, – тине Радий Хәбиров. – Беҙҙең милли команда резервында Александр Кадейкин һәм Шакир Мөхәмәҙуллин булды. Бынан тыш, “Салауат Юлаев”та – өс олимпия чемпионы: Тему Хартикайнен, Маркус Гранлунд, Сакари Маннинен, улар фин командаһына еңеүгә тос өлөш индерҙе. Был бөтә уңыштар һеҙгә плей-офф уйындарында тамашасыларыбыҙҙы шатландырырға өҫтәмә сәбәп һәм көс бирер, тип уйлайым. Беҙ һеҙҙән ғәҙел уйын көтәбеҙ.

Радий Хәбиров шулай уҡ әлеге ваҡытта дауаланған “Салауат Юлаев” уйынсыһы Родион Әмировтың тиҙерәк һауығыуын теләне.

– Әгәр ҙә кәрәк булһа, беҙ республика яғынан һәр төрлө ярҙам күрһәтәсәкбеҙ, – тине Башҡортостан Башлығы.

Команда капитаны Григорий Панин уйынсылар исеменән республика етәксеһенә булышлығы өсөн рәхмәт әйтте.

– Беҙ плей-офф уйындарына, еңеүгә әҙер. Республика һәм көйәрмәндәребеҙ өсөн уйнайбыҙ, – тине Григорий Панин.

“Себер” менән тәүге уйындарҙы өфөләр үҙ боҙонда 2 һәм 4 мартта уҙғара, ә ситтә 6, 8 мартта буласаҡ.

Әлфиә МИНҒӘЛИЕВА.

Фото: Башҡортостан Башлығы сайты.