Сит илдәрҙән ҡайта алмай ҡалған яҡташтар борсолмаһын

Әлеге ваҡытта бер ни тиклем Башҡортостан кешеләре сит илдәрҙә тороп ҡалды һәм кире әйләнеп ҡайтыу буйынса ауырлыҡтар кисерә. Бөгөн Хөкүмәттә үткән оператив кәңәшмәлә ошо турала һөйләшеү булды. Башҡортостан Башлығы Радий Хәбиров, һәр ваҡыттағыса, үҙенең һүҙҙәренә тоғро ҡалды: “Беҙ үҙебеҙҙекеләрҙе ташламайбыҙ”.

Был йүнәлештә эштәр нисек ойошторолғаны тураһында кәңәшмәлә тышҡы иҡтисади бәйләнештәр һәм конгресс эшмәкәрлеге министры Маргарита Болычева менән Туризм буйынса дәүләт комитеты рәйесе вазифаһын башҡарыусы Ринат Фәтҡуллин һөйләне.

Әлеге ваҡытта Ситуация үҙәге нигеҙендә штаб булдырылған, уның эше ике йүнәлеш буйынса алып барыла. Беренсеһе – үҙаллы туристар менән эшләү, икенсеһе – туроператорҙарҙан турҙар һатып алған ойошҡан туристар менән эшләү. Рәсәйгә ҡайтырға ярҙам итеү үтенесе менән йәмғеһе 23 мөрәжәғәт ҡабул ителгән. Алты кеше кире ҡайтарылған.

“Әгәр сит илдә ҡалған үҙаллы граждандар тиҙ арала Рәсәй Федерацияһына ҡайтмаһа, уларҙың визаһы тамамланыуы мөмкин һәм ҡатмарлыҡтар килеп тыуыуы ихтимал. Әгәр сит илдәге Рәсәй граждандарының визаһының тамамланыу ваҡыты етһә, кисекмәҫтән Рәсәй Федерацияһының дипломатик вәкиллегенә хәбәр итергә кәңәш итәбеҙ. Был хәл үҙгәргән һәм сит илдән сығыу менән проблемалар тыуған осраҡта Рәсәйҙең дипломатик ведомстволары ваҡытты үткәреп ебәреү эҙемтәләрен йомшартыу өсөн алдан саралар күрә алһын өсөн кәрәк”, – тине Маргарита Болычева.

Бөтәһенә лә мәғлүмәти ярҙам күрһәтелә. Ярҙам кәрәк булған осраҡта кешеләр 7 347 218 19 19 телефоны буйынса Ситуация үҙәгенә мөрәжәғәт итә ала. “Граждандарҙың ҡайҙа мөрәжәғәт итергә мөмкин икәнлеген аңлауы мөһим”, – тине Радий Хәбиров.

Туроператорҙар мәғлүмәттәренә ярашлы, ойошҡан туристар төркөмөнә килгәндә, 9 мартҡа сит илдән 1835 кеше ҡайтҡан, 760 кешенең ҡайтыуын көтәләр. 10 мартта Доминикананан 497 турист килеүе көтөлә.

– Сит илдә тағы 760 самаһы кеше ҡала, улар республикаға 12 мартҡа тиклем махсус рейстар менән ҡайта. Туроператорҙар мәғлүмәте буйынса, туристарҙың ойошҡан төркөмдәрен сығарыу илгә ҡайтарыу рейстары графигына ярашлы уҙғарыла (Доминикананан, Мысырҙан, Төркиәнән, Берләшкән Ғәрәп Әмирлектәренән). Яңы туристарҙы Кариб бассейны һәм Латин Америкаһы илдәренә (Доминикана, Венесуэла, Мексика, Куба) ебәреү башҡарылмай, – тине Ринат Фәтҡуллин.

Рәсәй авиацияһы бойороғона ярашлы, төп туроператорҙар 2022 йылдың 6 мартында Мәскәү ваҡыты буйынса 00.00 сәғәттән алып Рәсәй биләмәһендәге пункттарҙан сит дәүләттәр пункттарына пассажирҙар һәм йөк ташыуҙы ваҡытлыса туҡтатыу тураһында ғариза бирҙе. Был тәҡдим Рәсәй авиакомпанияларының сит илдә һауа судноларын тотҡарлау йәки ҡулға алыу хәүефенең юғары булыуына бәйле.

Сит илдә үҙаллы туристарға дәүләт комитеты Рәсәй өсөн асыҡ илдәр - Истанбул/ОАЭ/Катар/Сербия аша ҡайтарыу буйынса алгоритм әҙерләгән. Мәғлүмәт дәүләт комитеты сайтында һәм социаль селтәрҙәргә урынлаштырылған.

Илдең көньяғында ял итеүҙе тамамлаған туристарға аэропорттарға (Анапа, Белгород, Брянск, Воронеж, Геленджик, Краснодар, Курск, Липецк, Дондағы Ростов, Симферополь, Элиста) осоштарҙы ваҡытлыса сикләүгә бәйле туроператор аша йәки үҙаллы ҡайтыу маршруттарына төҙәтмәләр индерергә кәрәк.

Килеп тыуған хәлгә бәйле Башҡортостанда эске туризм күләме арта һәм ҙур ағымды ҡабул итергә әҙер булырға кәрәк, тип билдәләне республика Башлығы. Хөкүмәттә ошо мәсьәләне айырым ҡарарға ниәтләйҙәр.

Фото: cubanet.org