14-се тапҡыр – чемпиондар!

Өфөләге Ғ. Ҡадиров исемендәге Спорттың техник төрҙәре үҙәгенең “Башҡортостан” командаһы Шадринскиҙа үткәрелгән Рәсәйҙең боҙҙағы мотоуҙыштар буйынса чемпионаттың һуңғы этабында еңеү яуланы һәм 14-се тапҡыр чемпион булып танылды.

Никита Богданов, Динар Вәлиев, Евгений Шаров һәм Николай Красников алтын миҙал яуланы. Команданың тренеры – Рәсәйҙең атҡаҙанған тренеры Рәйес Мостафин. Әйткәндәй, республика мотоуҙышсылары йәнә 36 мәрәй яуланы һәм үткәндәге һөҙөмтәне тағы ҡабатланы. Динар Вәлиев иҫәбендә – 18, Никита Богдановтыҡы – 12, Евгений Шаровта алты мәрәй ине.

Икенсе урынды – Шад­ринскиҙың “Торпедо-ШААЗ” (28 мәрәй), өсөнсөнө Тольяттиҙың “Мега-Лада” командаһы (24 мәрәй) яуланы. Шулай итеп, “Мега-Лада”нан һигеҙ мәрәйгә артта ҡалып барған “Баш­ҡортостан” командаһы беренсе урынға сыға алды.

Чемпионаттың иң һө­ҙөмт­әле уҙышсылары:

1. Никита Богданов — 118 мәрәй;
2. Игорь Кононов — 114 мәрәй;
3. Дмитрий Солянников — 111 мәрәй;
4. Дмитрий Хомицевич — 93 мәрәй;
5. Дмитрий Колтаков — 79 мәрәй;
6. Динар Вәлиев — 64 мәрәй;
7. Василий Несытых — 51 мәрәй;
8. Евгений Шаров — 42 мәрәй.

Айһылыу НИЗАМОВА