Шундай хәлдәр осрай...

Өфөләге “Динамо”ла үткәрелгән янғын һүндереү һәм ҡотҡарыу спорты буйынса “Дуҫлыҡ” кубогына һәм “Алтын штурмовка” призына халыҡ-ара ярыштарҙа Беларусь, Үзбәкстан, Рәсәй, Һиндостан, шулай уҡ Башҡортостан спортсылары ҡатнаша.

Рәсәй йыйылма командаһы тренеры Руслан Хубецов Санкт-Петербург ҡалаһынан килгән. “Үҙем – Рәсәй Ғәҙәттән тыш хәлдәр министрлығының Санкт-Петербург буйынса идаралығы хеҙмәткәремен, - тип таныштырҙы ул үҙем менән һәм спорт сараһы айҡанлы уй-тәьҫораттары менән уртаҡлашты. – Бындай саралар янғын һүндереү һәм ҡотҡарыу спортының үҫеше өсөн кәрәк. Өҫтәүенә, шундай ғәҙәттән тыш хәлдәр теркәлә: уларҙа һөнәри оҫталыҡ, ҡыйыулыҡ, сослоҡ кеүек һыҙаттарҙан тыш, спортсыларға хас таҫыллыҡ һәм етеҙлек талап ителә”.

Тренерҙың белдереүекнсә, Санкт-Петербургтан Башҡортостанға биш спортсы килгән. Уларға һәм башҡа ҡатнашыусыларға уңыштар теләйек.

Ҡыҫҡаса белешмә. Руслан Хубецов спорттың был төрө менән 2002 йылда Аланияла шөғөлләнә башлаған. Ошо уҡ йылда ул Рәсәй Эске эштәр министрлығы Санкт-Петербург университетының дәүләт янғын хеҙмәткәрҙәре факультетына уҡырға ингән. Тренерҙары – Максим Нитецкий, Алексей Смирнов, Александр Сидоренко. 2006 йылда Тегеран ҡалаһында ул команда иҫәбендә чемпион тип таныла һәм штурмлау баҫҡысы буйынса уҡыу башняһының дүртенсе ҡатындағы тәҙрәһенә менеү буйынса бронза миҙал яулай. Руслан Хубецов 2006, 2011 йылдарҙа донъя чемпионы тип танылған, 2006, 2008, 010, 2011 йылдарҙағы донъя чемпионаттарҙа призлы урындар яулаған. Ул шулай уҡ бер нисә тапҡыр Рәсәй чемпионы исемен яулаған.

Автор фотоһы.