Монсон дәрес бирҙе

Хәҙер Өфөлә йәшәгән Джефф Монсон үҙенең спорт карьераһында 60 еңеүгә өлгәшкән. Ул – ҡара билбау хужаһы, бразил джиу-джитсуһы буйынса донъя чемпионы.

Билдәле булыуынса, Джефф Монсон Өфөлә джиу-джитсу һәм грэпплинг буйынса мәктәп асты. Ошондай көрәш үҙәге Башҡортостанда спортты үҫтереүгә тос өлөш индерәсәк.

Күптән түгел Джефф Монсон Рәсәйҙең Грэпплинг буйынса федерацияһының Волга буйы федераль округындағы рәсми вәкиле Арсен Зиннәтуллин менән берлектә Башҡортостандың спорт көрәше буйынса олимпия резервы мәктәбенең грэпплинг буйынса филиалы эшмә­кәр­леген тикшереү маҡсатында Октябрьский ҡалаһында булды.

Эш сәфәре ваҡытында исеме тотош донъяға билдәле спортсы урындағы балаларға оҫталыҡ дәрестәре бирҙе. Шулай итеп, ул бер юлы спортсыларҙың әҙерлек кимәлен дә баһаланы, шул уҡ ваҡытта грэпплинг алымдарын да күрһәтте. Джефф Монсондан был үҙенсәлекле спорт төрөнөң нескәлектәре хаҡында кәңәштәр ишетеү, төрлө алым­дарға өйрәнеү йәш спортсылар күңе­лендә оҙаҡ һаҡланыр, моғайын.

Әйткәндәй,  Башҡортостандың Спорт көрәше буйынса федерацияһы беренсе президенты итеп грэпплинг буйынса донъя чемпионы Джефф Монсон һайланды.

Был спорт төрөнә ҡағылышлы тағы бер яңылыҡ бар. Башҡортостан Рес­пуб­ликаһы Башлығы ҡарамағындағы Башҡортостан дәүләт хеҙмәте һәм идара итеү академияһы кубогына “Грэпплинг UWW” спорт көрәше буйынса асыҡ турнир 29-30 сентябрҙә үткәрелер тип көтөлә.

Айһылыу НИЗАМОВА