Көйәрмәндәр спортсылар менән осрашты

Өфөлә үткәрелгән XXXIII Бөтә Рәсәй олимпия көнөнөң маҡсаты халыҡты физик культура, спорт менән даими шөғөлләнеүгә йәлеп итеү, олимпия хәрәкәтен пропагандалау ине.

Өфөләге Рима Баталова исе­мендәге Спорт әҙерлеге үҙәгендә үткәрелгән сара “Чемпион менән зарядка”нан башланды. Теләге булғандар спортсылар менән аралашты, үҙҙәрен төрлө спорт төрҙәрендә һынаны, оҫталыҡ дәрестәрен ҡараны, волейбол, баскетбол, еңел атлетика һәм башҡа спорт төрҙәрендә ҡатна­шыусылар өсөн янып-көйҙө, кемдер ГТО нормаларын тапшырҙы.

Спорт байрамында ҡатнаш­ҡан абруйлы ҡунаҡтар араһында Рәсәй Спорт федерацияһы секретары, күп тапҡыр Паралимпия, донъя, Европа, ил чемпионы Татьяна Кириенко, республи­каның спорт министры Руслан Хәбибов, бокс буйынса Рәсәйҙең атҡаҙанған тренеры Алексей Тищенко һәм башҡалар бар ине.

Ошо уҡ көндө лайыҡлыларға спорт өлкәһендәге гранттар һәм махсус программалар сертификаттары тапшырылды. Бүләк­ләнеүселәр араһында Әбйәлил районынан Балалар-үҫмерҙәр спорт мәктәбенең волейбол буйынса тренеры Илмир Бүлә­к­баев, Белорет районынан бокс буйынса тренер Фидан Сибәғә­тов һәм Әлшәй районынан ауыр атлетика буйынса тренер Рифат Миңлейәров бар ине. Улар “Ауыл тренеры” программаһы буйынса 600 мең һумлыҡ сертификатҡа лайыҡ булды.

Айһылыу НИЗАМОВА