Шөғөллән дә аҡсаһын кире ал

Тиҙҙән, 1 августа, Рәсәйҙә физик шәхестәр спорт менән шөғөлләнгән өсөн һалым ҡайтармаһын алыу тураһындағы яңы закондың ғәмәлгә инеүенә бер йыл тула.

Шулай итеп, былтыр граж­дандарҙың фитнес-клубтарға һатып алған абонемент йәки башҡа спорт-һауыҡтырыу хеҙ­мәт­тәре хаҡының 13 процентын кире ҡайтарыу мөмкинлеге бар. Уны үҙең һәм балалар өсөн дә юлларға була, тик быға рәсми эш хаҡы алғандар ғына дәғүә итә.

Был иһә спорт менән шөғөл­ләнгән өсөн сарыф ителгән аҡсаның бер өлөшөн кире ҡайтарырға мөмкин тигән һүҙ. Ошо өҫтөнлөккә эйә булырға теләгәндәр легаль клубтарға бара һәм мотлаҡ килешеү тө­ҙөй. Шулай итеп, эшҡыуар­ҙар ҙа клиенттарҙы юғалтмау өсөн спорт эшҡыуарлығын теркәргә һәм алынған килем өсөн һа­лым түләргә тырыша. Был Рә­сәйҙә һәм республикала спорт менән шөғөлләнергә теләгән­дәр һанын арттырыуға булыш­лыҡ итәсәк.

Һалым ҡайтармаһы Спорт министрлығының махсус исем­легенә индерелгән спорт клуб­тарындағы дәрестәр өсөн генә бирелә икәнлеген хәтерҙән сығармайыҡ. Ошо ведомство исемлегендә булған клубҡа абонемент һатып алғанһығыҙ икән, һеҙгә һалым ҡайтармаһы тейеш.

Һалым ташламаһын ике ысул менән кире ҡайтарырға мөмкин. Беренсеһе: nalog.ru сайтындағы шәхси кабинетта “Ҡайтарма алырға” тигән бүлек­тә ғариза һәм клуб менән төҙөл­гән килешеү сканын беркетеп, ҡайтарманы тулыһынса алырға була. Был ысул буйынса түләү­ҙәр 2023 йылдан башлана.

Икенсе ысул: һалым ҡайтар­маһын эш биреүсе аша ла юлларға мөмкин. Бының өсөн nalog.ru сайтында ҡайтарма алыуға хоҡуғыңды раҫлау тура­һында ғариза бирергә кәрәк. 30 көн эсендә һалым инспек­цияһы һеҙҙең эш биреүсегә ошо хаҡта хәбәр итә.

Социаль льготаға документ­тарҙы өс йыл эсендә тапшы­рырға кәрәк. Мәҫәлән, быйыл абонемент һатып алһағыҙ, Федераль һалым хеҙмәтенә ғаризаны 2023, 2024 йәки 2025 йылдарҙа бирергә мөмкин.

Айһылыу НИЗАМОВА