Иғтибар: ваҡыты күсерелде

30 июлдә үткәрелергә тейешле “Терра Башҡортостан” ат спорты турнирын 14 авгусҡа күсерҙеләр, тип хәбәр итте республиканың Ауыл хужалығы министрлығының матбуғат хеҙмәте.

Ә бына ярыштарҙың финалы, быға тиклем иғлан ителгәнсә, 10 сентябрҙә үткәрелер тип көтөлә. Әйткәндәй, быйыл ярыштарҙа  башҡорт тоҡомло 200 ат ҡатнашты һәм уларҙың 68-е сирек финалға сыҡты.

Хәтерегеҙгә төшөрәбеҙ: сараға инеү ирекле. Быйыл “Терра Башҡортостан” ат спорты турнирының приз фонды 10 миллион һум тәшкил итә.

“Терра Башҡортостан”да жокей булараҡ спорт категория­һына эйә профессионалдар түгел, ә һыбай сабырға яратҡан 14 йәштән өлкән һәүәҫкәрҙәр сығыш яһай. Райондарҙа уҙған һайлап алыу бәйгеләрендә баш­ҡорт тоҡомло һәм урындағы тоҡомһоҙ аттар ғына ҡатнаша ала. Турнирҙың бурысы – йәштәрҙе йылҡысылыҡ­ҡа, ат спортына йәлеп итеү, район­дарҙа малсылыҡтың ошо тарма­ғын тергеҙеү, һәүәҫкәрлектән профессиональ категорияға күсеү системаһын булдырыу.

“Терра Башҡортостан” ат спорты турниры 2019 йылдан үткәрелә.

Алһыу НИЗАМОВА