Ғафуриҙар сәләмәт тормош яҡлы

Ғафури районы спортсыларының волейбол, еңел атлетика, саңғыла уҙыш, спорт туризмы, милли көрәш, баскетбол кеүек айырыуса популяр спорт төрҙәре буйынса күп кенә ярыштарҙа даими призлы урындар яулауы хаҡында яҡшы хәбәрҙарбыҙ.

Күптән түгел “Йәшлек” ял паркында ойошторолған крос­та ҡатнашыу өсөн Ҡауарҙы, Бурлы ауылдарынан, Красно­усолдағы 1-се һәм 2-се мәктәп, Красноусол башҡорт гимназия-интернатынан спортсылар килгәйне. Мәктәп уҡыусы­ларына өлкән йәштәге йүгереү­селәр ҙә ҡушылды. Һәр ярышта әүҙем ҡатнашҡан спортсы ветерандар Ғайса Кейекбаев, Фәтҡулла Әхмәтйәнов, Роза­лиә Дәүләтбаеваны хәҙер башҡа райондарҙа ла яҡшы беләләр. Был юлы уларға элек Ғафури район суды рәйесе булып эшләгән, хәҙер Өфө ҡалаһында йәшәгән Фәйез Ҡасҡынбаев өҫтәлде.

Башта ярышта ҡатнашыу­сылар төрлө күнекмәләр яһаны. Һуңынан уларҙы кросты ойоштороусы Лиана Хәкимова, байрам менән ҡотлап, физкультура һәм спорттың һаулыҡ өсөн ыңғай йоғонтоһо тураһында һөйләне, һәр кемдең һаулыҡ, сәләмәт тормош алып барыуын теләне.

Иң тәүҙә, старт һыҙығына баҫып, бәләкәй йүгеректәр ярышты башлап ебәрҙе. Бер километрға йүгергән 10-12 йәшлектәр араһында, бер-береһенең үксәһенә баҫа яҙып йүгереп, Ҡауарҙы малайҙары Рамаҙан Исмәғилев – алтын, Илнар Абдуллин көмөш миҙалға лайыҡ булды. Өсөнсө урынға 2-се мәктәп уҡыусыһы Рәсүл Ырыҫҡолов сыҡты. Ошо уҡ йәштәге ҡыҙҙар араһында 1-се мәктәптән Эллана Сундукова – беренсе, Өфө ҡунағы Ләйсән Ҡасҡынбаева – икенсе, Клара Исмәғилева өсөнсө урынды яуланы. Үҫмер ҡыҙҙар араһында 1-се мәктәптән еңел атлетика буйынса күп тапҡыр еңеүсе булған Карина Торопкина был юлы ла беренселекте бер кемгә лә бирмәне. Ошо уҡ мәктәптән Амелия Ильясова – икенсе, Ҡауарҙынан Дилара Дәүләтбаева өсөнсө булып килде.

16 йәшлектәр һәм унан өлкәндәр төр­көмөндә ике километр арауыҡҡа йүгереүҙә Ҡауарҙынан Айтуған Абдуллин – беренсе, Бурлынан Вилдан Ғәлин – икенсе, Красноусолдан Илнур Кейекбаев өсөнсө урынға сыҡты.

Ҡыҙҙар араһында 1-се мәк­тәптән Арусик Мартиросян – беренсе, Красноусол башҡорт  гимназияһынан Гөлназ Дәүләт­баева икенсе булып килде. Ә өлкәндәр төркөмөндә Розалиә Дәүләтбаева, Фәйез Ҡасҡын­баев һәм Ғайса Кейекбаев алдынғы урындарҙы бер кемгә лә бирмәне.

Кроста йүгереүселәрҙең уҙышыуы ғына түгел, ә бер-береһе менән аралашыуы ла йылы тойғолар ҡалдырҙы. Йыраҡ тип тормай, Ҡауарҙы ауылының Шайморатов урамы йәштәрен, балаларын туплап, үҙенең микроавтобусында алып килгәне өсөн Азат Исмәғилевкә “Афарин!” тип әйтеүселәр күп булды. Эйе, биш бала атаһы үҙенең балаларында ла спортҡа һөйөү тәрбиәләп үҫтерә, шул уҡ ваҡытта башҡаларҙы ла йәлеп итеп, ярыштарға барырға ярҙам итә. Уны изге күңелле ысын депутат тиергә була.

Көндөң икенсе яртыһында “Йәшлек” ял паркының йәшел сиҙәмендә футболсы­лар­ҙың дүрт командаһы ярышты. Һөҙөмтәләр буйынса беренселекте “Усолье”, икенсене – “Самарка”, өсөнсөнө – “Стартап”, ә дүртенсе урынды Красноусол башҡорт гимназия-интернаты командаһы яуланы.

Ярыштарҙан спортсы­ларҙың икенсе һулышы ғына асылып ҡалманы, ә тамашасылар ҙа дәрт-сәм алып ҡайтты. Спортсыларыбыҙ артабан да беҙҙе юғары ҡаҙа­ныштары менән һөйөндөрөп торор, тип ышанабыҙ.

- Әлфиә ВӘЛИЕВА
Ғафури районы