Бишбүләк районының иң дәртле, эҙләнеүсән пенсионерҙары Ишембай районындағы Торатау шиханына сәйәхәткә ҙур теләк менән барып ҡайтты. Экскурсия геопарк үҙәгенән, шихандар тарихын өйрәнеүҙән башланды. Сәфәрселәр тау итәгендә урынлашҡан үҙенсәлекле солоҡ умартасылығы менән бик ҡыҙыҡһынып танышты, башҡорт бал ҡортоноң үҙенсәлектәре тураһында күп яңылыҡ белде.
Сәйәхәтселәр солоҡтоң төҙөлөшөн ҡараны, тәмле йүкә балы менән хуш еҫле үлән сәйен рәхәтләнеп эсте. Туристарға йәйәнән уҡ атыу буйынса оҫталыҡ дәресендә ҡатнашырға, хан тирмәһе эргәһендә фотосессия ойошторорға мөмкинлек булды. Ҡайтыр алдынан өлкәндәр Кантюковка ауылындағы әллә ҡайҙан күркәм булып күренеп ултырған “Суфыя” мәсетенә лә инеп сыҡты. Сәйәхәтселәр оло йәштәгеләр өсөн матур ял ойоштороусыларҙың һәммәһенә рәхмәт белдерҙе. “Тәьҫораттар иҫ киткес ҙур, һөйләп бөтөрөрлөк түгел! Әлдә барғанмын әле, тип һөйөнөп бөтә алмайым”, – ти Эльвира Зарипова.
Иҫегеҙгә төшөрәбеҙ, турҙар “Башҡортостан оҙон ғүмерлелеге” программаһына ярашлы үткәрелә. Бының өсөн https://долголетие.соцтуризмрб.рф сайтында теркәлергә һәм турға яҙылырға кәрәк. Проект 55 йәшкә еткән ҡатын-ҡыҙҙар һәм 60 йәште уҙған ир-ат өсөн ойошторола. Төп талап – сәйәхәттә ҡатнашырға теләүселәр Рәсәй гражданы һәм республика биләмәһендә теркәлгән булырға тейеш. Проектҡа ярашлы, Башҡортостан буйлап сәйәхәткә йылына бер тапҡыр сығырға мөмкин.
Динә АРЫҪЛАНОВА