Һаулыҡ та, дуҫлыҡ та

21 ноябрҙә Башҡортостан Башлығы Радий Хәбиров аҙналыҡ оператив кәңәшмә үткәрҙе, унда IX Халыҡ-ара мәктәп спорты фестиваленә йомғаҡ яһалды. Сара 14 ноябрҙән 19-на тиклем Өфөлә үтте.

Республиканың спорт министры Руслан Хәбибов туғыҙ йыйылма команда составында 400-ҙән ашыу спортсының ҡатнашыуы хаҡында һөйләне.

Ярыштар Өфөнөң өс майҙансығында – Рима Баталова исемендәге спорт әҙерлеге үҙәгендә, “Динамо” спорт комплексында һәм 32-се спорт мәктәбендә үтте. Дөйөм команда зачетында беренсе урынды Әрмәнстан командаһы алды, икенсене – Рәсәй, өсөнсөнө – Ҡаҙағстан йыйылма командалары.

Руслан Хәбибов 2023 йылда Башҡортостанда Рәсәй һәм Белорусь мәктәп спорты фестивале уҙасағын да хәбәр итте. Ул Өфөлә ике ил төбәктәренең X юбилей форумы сиктәрендә уҙа.

– Балаларыбыҙ уларҙа әүҙем ҡатнашһын өсөн бындай спорт сараларын күберәк үткәреү мөһим, – тип йомғаҡ яһаны Башҡортостан Башлығы Радий Хәбиров.

Фото: Башҡортостан Башлығы сайты.