Һынатмаҫ тип ышанабыҙ

Шорт-трек ярыштарының ҙур тиҙлектә үткәрелеүе, мауыҡтырғыс, ылыҡтырғыс булыуы күптәрҙе йәлеп итә. Тағы шуныһы һөйөнөслө: был спорт төрө менән республикала даими шөғөлләнеүселәр күп.

Шорт-трек буйынса Олимпия уйындары чемпионы, 31 йәш­лек Семен Елистратов – Өфө егете. Ул – Рә­­сәйҙең атҡа­­ҙан­ған спорт мастеры. Семен Елистратов 2014 йылда Олимпия уйындары чемпионы булып танылды, 2018 йылдағы Олимпия уйындарында бронза миҙалға лайыҡ булды. Яҡташыбыҙ бер тапҡыр – донъя чемпионатында, 14 тапҡыр Европа чемпионатында еңеү яуланы.

Өфө егетенең спортҡа ылы­ғып китеүе лә бик ҡыҙыҡ­лы. Семен, бала сағында атаһы­ның кәңәшен тотоп, тхэквондо менән шөғөлләнә башлаған, әммә, күп тә үтмәй, был спорт төрөнөң күңеленә ятма­ғанын аңлаған, артабан хок­кейҙа үҙен һынап ҡараған. V класта уҡығанда тренер Ан­дрей Максимов менән осрашыу егеттең тормошон бөтөн­ләй үҙгәрткән. Шулай итеп, ул баш ҡаланың Октябрь райо­нын­дағы 1-се олимпия резер­вын­дағы балалар һәм үҫмер­ҙәр спорт мәктәбенә күнекмә­ләргә йөрөй башлаған.

1987 йылда Башҡортос­танда барлыҡҡа килгән шорт-трек мәктәбендә әллә күпме ҡыҙ һәм егет тәрбиәләнгән. Был үҙәк хәҙер донъялағы иң яҡшы ойошмаларҙың береһе һанала, һәм унда 200-ҙән ашыу ҡыҙ һәм егет шө­ғөлләнә.

Өфөлә “Төҙөүсе” стадионы эргәһендә тотош спорт комплексы бар. Ул бынан өс йыл элек төҙөлөп бөткәйне. Бында шорт-трек өсөн та­лаптарға яуап биргән иле­беҙҙәге берҙән-бер боҙ аре­наһы урынлашҡан. Мәктәп советының үтенесе менән үҙәккә данлыҡлы яҡта­шыбыҙ Семен Елистра­товтың исеме бирелгән. Шөкөр, ул һынат­маны: быйыл тағы Олимпия миҙалын яуланы.

– Мин ябай ғаиләлә тыуған­мын, беҙҙә береһе лә спорт менән шөғөлләнмәй ине. Даими күнегеүҙәр һәйбәт һөҙөмтә­ләргә килтерҙе, шуға күрә ҡыҙ­ҙарға һәм малайҙарға: “Тыры­шырға кәрәк”, тип өндәшәм, – тигәйне Семен Елистратов бер сара барышында. – Рес­пуб­ликабыҙҙа халыҡ-ара ярыш­тарҙа ҡатнашыр өсөн барлыҡ шарттар булдырылған. Тап шуға ла көн һайын улымдың нисек үҫкәнен күҙәтә алам, ҡатыным да эргәмдә. Өфөлә шөғөлләнер һәм донъяуи сараларҙа ҡатнашыр өсөн уңайлы шарттар бар.

Һуңғы йылдарҙа республи­кабыҙҙың спорт тармағындағы ыңғай үҙгәрештәр спортсы­ларҙың ҡаҙаныштарында ла сағылыш тапмай ҡалмай, әлбиттә. Күптән түгел Семен Елистратов та Рәсәйҙең шорт-трек буйынса кубогына ярыш­тарҙың өсөнсө этабында 1500 метр арауыҡҡа уҙышта беренсе урынды яуланы. Был сараның ошоға тиклемге этаптарында Өфө егете еңеү яулағайны. Баш ҡалабыҙҙа 500 метр арауыҡҡа уҙыштарҙа ла һынатмаҫ, тип ышанабыҙ.

Айһылыу НИЗАМОВА