Силәбе губернаторы кубогын яуланы

Һуңғы йылдарҙа республикабыҙҙа ат спорты үҫешә. Был – һөйөнөслө күренеш, сөнки элек-электән башҡорттарҙа елдәй һыбай елдереү егетлек билдәһе, ғорурлыҡ һаналған. Әле лә шулай: был спорт төрөн үҙ иткәндәр һоҡланыу уятмай ҡалмай.

“Терра Башҡортостан” тур­ни­рының үткәрелеүе – үҙе бер ҡыуаныс. Уның маҡсаты – республика райондарында йыл­ҡы­сылыҡты һәм ат спортын үҫ­тереү кимәлен күтәреү арҡы­лы башҡорт аттары генофондын барлыҡҡа килтереү һәм арттырыу. Халҡым ҡото булған аттар иһә сыҙамлы, аҡыллы булыуы менән айырыла. Бынан тыш, ошондай саралар ярҙамында милли йолалар һаҡлана һәм сәләмәт тормош алып барыу пропагандалана.

Ат ярыштарын үҙ иткән спортсыларыбыҙ ҙа ҙур ҡаҙа­нышҡа өлгәшә. Мәҫәлән, быйыл йәй беренсе тапҡыр һы­бай килеш көрәш буйынса турнир ойошторолдо. Был сара Татарстанда билбаулы көрәш буйынса донъя чемпионаты ваҡытында үткәрелде. Ошо үҙенсәлекле сағыу ярышта 90 килограмға тиклемге ауырлыҡ үлсәмендә яҡташыбыҙ Ғәлим Яуынбаев чемпион исемен яуланы. Башҡортостан исеменән сығыш яһаған Әбйәлил райо­ны командаһы (тренеры – Салауат Баһаув) спортсыһы кө­сөргәнешле финалда Ҡыр­ғыҙстан егетен еңде!

Күптән түгел билдәле спорт­сы, донъя кубогы этаптары еңеүсеһе, халыҡ-ара спорт мастеры Ольга Данилова Силәбе өлкәһе губернаторы кубогын яуланы, конкур буйынса Бөтә Рәсәй ярыш­тарының абсолют беренсе­легендә өсөнсө урынды яуланы. Әйткәндәй, ул спорт мәктәбендә лә эшләргә, ярыш­тарҙа сығыш яһарға һәм еңергә лә өлгөрә.

Белгестәр әйтеүенсә, һәр спорт төрө үҫеше сараларҙы даими үткәреүҙән башлана. Декабрҙә республикабыҙҙың баш ҡалаһында конкур буйынса ярыштарҙың үткәрелеүе көтөлә.

Айһылыу НИЗАМОВА