Бер балаға сәйәхәттең хаҡы – ете мең һум

Бөгөн Башҡортостан Башлығы Радий Хәбиров социаль селтәрҙә сираттағы тапҡыр республикабыҙҙың матурлығы тураһында һәм уны балаларҙың күрә алыу мөмкинлеге тураһында һөйләне.

“Башҡортостандың гүзәллеге тураһында күп һөйләргә була, әммә тыуған яҡты ысын мәғәнәһендә баһалау өсөн уны үҙ күҙҙәрең менән күреү яҡшыраҡ. Республикабыҙҙан 5-9-сы кластарҙағы 11 меңдән ашыу уҡыусы сентябрҙә башланған мәктәп туризмы программаһында ҡатнашты. Был – федераль проект, унда Башҡортостан һынау төбәге булды. Уны тормошҡа ашырыуға быйыл республика федераль ҡаҙнанан 55,7 миллион һум алды, 22 миллион һум төбәк бюджетынан бүленде.

Пилот проект уңышлы булып сыҡты. Балалар ҙур ҡәнәғәтлек менән республиканы аса: Өфө уҡыусылары – Нуриман һәм Бәләбәй райондарында, Ишембай һәм Салауат ҡалаларынан балалар Өфөлә булды, Урал аръяғынан үҫмерҙәр Сибайҙы һайланы.

Бер балаға турҙың хаҡы – ете мең һум. Дауамлылығы – бер тәүлектән кәм түгел. Юл йөрөү, туҡланыу, ҡунаҡханаға урынлашыу, экскурсиялар – барыһы ла бушлай. Программала ҡатнашыусыларҙы урындағы мәғариф бүлектәре һайлап ала, туроператорҙар араһынан – төбәктәге иң ышаныслы 10 оператор.

Киләһе йылда программаны финанслау арта – федераль ҡаҙнанан 188,7 миллион һумға тиклем һәм республиканан 75,5 миллион һум. Һәм был – Рәсәйҙә Мәскәү өлкәһенән ҡала икенсе урын. Программала 37,7 мең уҡыусы ҡатнашыр тип көтөлә.

Фото: "Бәйләнештә".