Һине сикһеҙ яратабыҙ. Тыныс йоҡла...

Өс тапҡыр донъя чемпионы, Бразилия футболсыһы Пеле 82-се йәшендә вафат.

Пеле ноябрь аҙағынан дауаханала булған. Уның организмы химиотерапияға яуап биреүҙән туҡтай, шуға ла табиптар паллиатив дауалауға күсә, яман шеш ваҡытында артабанғы стадиялағы ауыртыуҙы еңеләйтәләр, әммә футболсы вафат була.

Бразилияның легендар футболсыһының ҡыҙы Кели Насименту атаһының үлемен раҫлаған.

“Һин булғанға, беҙ барбыҙ. Һине сикһеҙ яратабыҙ. Тыныс йоҡла...”, – тип яҙа Кели Насименту социаль селтәрҙә.

Пеле — Бразилия йыйылма командаһында өс тапҡыр Донъя кубогы чемпионы була. Халыҡ-ара футбол федерацияһы Пелены "XX быуаттың иң яҡшы футболсыһы" тип таный. Донъяла өс тапҡыр уйынсы булараҡ донъя чемпионы булған берҙән-бер футболсы - был 1958, 1962 һәм 1970 йылдарҙа була. 1966 йылғы донъя чемпионатында Бразилия командаһы төркөмдән сыҡмай. Бразилия йыйылма командаһы өсөн 92 матч үткәрә һәм 77 мәрәй индерә.

Пелены 3 ғинуар ерләйәсәктәр. Был хаҡта спортсы уйнаған “Сантос” футбол клубының матбуғат хеҙмәте хәбәр итә.

Футбол легендаһы менән хушлашыу тантанаһы 2 ғинуарҙа “Вила Белмиро” стадионында башланасаҡ һәм яҡынса бер көн дауам итәсәк. Бынан һуң футболсының кәүҙәһен Сантос урамдары буйлап полиция оҙатыуында алып китәләр, әсәһенең йорто эргәһенән үтәсәктәр.

Пеле “Экуменика” некрополе территорияһында ерләнәсәк, ул донъялағы иң юғары вертикаль зыярат һанала, Гиннесстың рекордтар китабына индерелгән. Ерләү сараһының был өлөшөндә футбол легендаһының туғандары һәм яҡындары ғына буласаҡ.

Фото: kp.ru