Тренерҙың эше дауам итә

Халыҡ-ара спорт мастеры, Башҡортостандың атҡаҙанған физик культура хеҙмәткәре Фәрит Ғүмәров – Башҡортостанда бильярд спортына нигеҙ һалыусыларҙың береһе. Уның яҡты иҫтәлегенә республикала турнир үткәрелде.

Фәрит Ишмөхәмәт улы әллә күпме билдәле, Рәсәй һәм халыҡ-ара турнир­ҙарҙа призлы урындар яулаған спортсылар әҙерләгән. Ара­быҙҙан ун йылдан ашыу элек киткән тренер тураһында яҡты иҫтәлек һаҡлана һәм уның эше дауам итә.

Республикабыҙҙан Өфө, Бөрө, Бәләбәй, Стәрлетамаҡ, Нефтекама, Туймазы, Мәләүез, Дүртөйлө ҡалаларынан, Бишбүләк, Приют ҡасабаларынан, Үрге Йәркәй, Шишмә ауылдарынан спортсылар сарала үҙ көсөн һынаны. Бынан тыш, Ҡазан, Ижевск, Ырымбур, Магнитогорск һәм башҡа ҡалаларҙан спортсылар ҡатнашты. Һөҙөмтәлә яҡташыбыҙ, Рәсәй спорты мастеры Артем Сәйетғәлиев беренсе урынды яуланы. Ул хәҙер Ханты-Манси округы өсөн сығыш яһай. Көмөш миҙалға – Ырымбур өлкәһенән Константин Крюков, бронзаға Татарстан өсөн сығыш яһаған Илья Старосельский лайыҡ булды.

Айһылыу НИЗАМОВА