"Уларҙың еңеүҙәре балаларҙы ла илһамландыра"

Бөгөн Башҡортостан Башлығы Радий Хәбиров Рима Баталова исемендәге Спорт әҙерлеге үҙәгендә грек-рим көрәше буйынса Рәсәй чемпионатын асыу тантанаһында ҡатнашты. Бындай ярыш республикала беренсе тапҡыр үткәрелә, бында илдең 40 төбәгенән 320 иң көслө спортсы йыйылды.

Турнир Сеулдағы Олимпия уйындарының 35 йыллығына арнала. Унда СССР-ҙың йыйылма командаһы көрәшселәре триумфаль сығыш яһай - грек-рим һәм ирекле көрәш буйынса һигеҙ алтын, дүрт көмөш һәм өс бронза миҙал яулап, Советтар Союзы командаһын дөйөм иҫәптә беренсе урынға сығара.

Башҡортостан Башлығы ярыш ҡунаҡтарын һәм ҡатнашыусыларын тәбрик итте һәм танылған спортсыларға наградалар тапшырҙы. Рәсәйҙең атҡаҙанған тренеры, республика Спорт көрәше федерацияһының почетлы вице-президенты Венер Ғәйнуллин - «Башҡортостан Республикаһы алдындағы ҡаҙаныштары өсөн» ордены, Рәсәйҙең атҡаҙанған тренеры Борис Понятов Салауат Юлаев ордены менән бүләкләнде. Республика Башлығы шулай уҡ 2021 йылда спорт көрәше буйынса донъя чемпионаты еңеүселәре Адлан Амриев менән Сәйет-Хөсәйен Баҡаевҡа - фатирға сертификаттар, ә уларҙың тренерҙары Валерий Коробов, Рәмил Сираев һәм Геннадий Сырцовҡа автомобилгә сертификаттар тапшырҙы.

Чемпионатҡа ҡағылышлы уй-фекерҙәрен республика Башлығы социаль селтәрҙә лә яҙып ҡалдырҙы.

"Бөгөн Өфөлә Рәсәйҙең 40 төбәгенән 320 спортсы, 15-тән ашыу Олимпия чемпионы - Рәсәй һәм совет спорты легендалары йыйылды. Республикабыҙ тарихында беренсе тапҡыр грек-рим көрәше буйынса Рәсәй чемпионатын уҙғарабыҙ.

Был - беҙҙең өсөн ҙур мәртәбә. Бөгөн Башҡортостан спорт әҙерлеге үҙәгендә - иң көслө кешеләр. Бындай сараларҙың йәштәрҙе йәлеп итеүе мөһим: малайҙар билдәле көрәшселәрҙе күрә, уларҙың еңеүҙәренән илһамланып, үҙҙәре секцияларға яҙыла. Һәм был, моғайын, ошо кимәлдәге ярыштарҙың төп һөҙөмтәһелер. Уларҙың барыһы ла чемпион да булмаҫ, бәлки, әммә спорттың барыһына ла файҙа килтерәсәге - бәхәсһеҙ.
Ҡатнашыусыларға һәм тамашасыларға матур һәм ғәҙел көрәш теләйем!" - тип яҙҙы республика Башлығы.

Сығанаҡ: glavarb.ru, vk.com/radiyhabirov