Кем елдәй саңғы шыуырға, конькиҙа уҙышырға яратмай?

Өфөлә Ҡышҡы спорт төрҙәре көнө башланды. Бынан тыш, баш ҡалабыҙҙа йәш үҫмерҙәр араһында биатлон буйынса Рәсәй беренселеге ойошторолдо. Әйткәндәй, Ҡышҡы спорт төрҙәре көнө, Рәсәйҙең Олимпия комитеты ҡарарына ярашлы, 2015 йылдан үткәрелә.

Биатлонды күптәр ярата

“Спорттың ҡышҡы төрҙәре көнө” тотош илдә 2023 – 2026 йылдарға Рәсәй Олимпия комитетының күп кеше ҡатнашҡан спорт үҫешенә булышлыҡ итеү “Олимпия иле” программаһына ярашлы ойошторола. Биатлон иһә беҙҙә – иң яратҡан спорт төрҙәренең береһе. Башҡортостан Республикаһы етәкселегенең даими иғтибары ярҙамында был спорт төрө тағы ла юғарыраҡ юҫыҡҡа күсә, күберәк популярлыҡ яулай бара.

Өфөләге “Биатлон” спорт комп­лексы ғәҙәттә булмағанса, икенсе төҫ алғайны, спортсылар, спорт һөйөүселәр тауышына сумғайны. Сараны асыу тантанаһында Баш­ҡортостан Хөкүмәте Премьер-министры урынбаҫары Ирек Сәғитов, республиканың спорт министры Рус­лан Хәбибов, 13 тапҡыр Паралимпия уйындары чемпионы, 18 тапҡыр донъя чемпионы, 43 тапҡыр Европа чемпионы, Рәсәй Дәүләт Думаһы депутаты, Рәсәйҙең атҡаҙанған спорт мастеры Рима Баталова, Рәсәй Биатлонсылар союзының Башҡарма комитеты етәксеһе, союздың вице-президенты Иван Мелехов, биатлонсы, Рәсәйҙең атҡаҙанған спорт мастеры ике тапҡыр Олимпия уйындары, биш тапҡыр донъя чемпионы Светлана Ишморатова, Башҡортостан Башлығы Гранттар фонды генераль директоры вазифаһын башҡарыусы Роман Низаметдинов  ҡатнашты. Ә Рәсәй чемпионатында үҙ көсөн һынау өсөн Рәсәйҙең 23-тән ашыу төбәгенән  220-нән ашыу спортсы килде.  

 – Башҡортостан Башлығы Радий Фәрит улы Хәбиров исеменән һәм шәхсән үҙем Ҡышҡы спорт төрҙәре көнөндә һәм йәш үҫмерҙәр араһында биатлон буйынса Рәсәй беренселегендә ҡатнашыусыларҙы сәләмләйем,  – тине Ирек Сәғитов.  – Башҡортостанда, Рәсәйҙең ал­дынғы спорт үҙәктәренең береһен­дә, йыл һайын биатлон буйынса Рәсәй, халыҡ-ара ярыштары үт­кәрелә.

Республикабыҙҙа спортты яраталар, өҫтәүенә, был өлкәгә бүлен­гән иғтибар, ярҙам да бик ҙур. Бөгөн сарала бер төркөм спортсыларға наградалар тапшырылды. Улар ара­һында бобслейсы, Пекиндағы Олимпия уйындарында ҡатнашҡан Юлия Беломестных бар ине. Уға спорттағы юғары ҡаҙаныштары өсөн Башҡортостан Башлығы Радий Хәбировтың Рәхмәт хаты тапшырылды.

Юлия күрше Ырымбур өлкәһе­нең Новотроицк ҡалаһында тыуып үҫкән, шунда уҡыған. Уны уңышлы ғына түгел, ә илебеҙ спортындағы иң сибәр спортсыларҙың береһе тип йөрөтәләр. Юлия 2-се балалар һәм үҫмерҙәр спорт мәктәбендә тренер Алексей Дашевский менән шөғөлләнгән. 2013 йылда ил беренселегендә алтын миҙалға лайыҡ булған. 19 йәшендә Мәскәүгә килеп, бобслей менән шөғөлләнә башлаған. 2016 йылдың феврален­дә Австрияла Бобслей һәм скелетон буйынса донъя чемпионатында 11-се урын яулаған. Бер йыл үткәс, Рәсәйҙә бобслей һәм скелетон буйынса Любовь Черных менән берлектә бронза миҙал яулаған. 2018 йылдың февралендә Рәсәй исеменән Пхёнчханда сығыш яһаған.

Башҡортостандың спорт министры Руслан Хәбибов сарала ҡатна­шыу­сыларға уңыштар теләне һәм Спорттың ҡышҡы төрҙәре көнөн, йәш үҫмерҙәр араһында Рәсәйҙең биатлон буйынса чемпионатын асыҡ тип иғлан итте.

Әйткәндәй, социаль йәһәттән әһәмиәтле “Ҡышҡы спорт төрҙәре көнө” Башҡортостан Башлығы Гранты аҡсаһына Башҡортостан Баш­лығы Гранттар фонды ярҙамында тормошҡа ашырыла. Был сара шулай уҡ Башҡортостан Спорт министрлығының 100 йыллыҡ юбилейына арнала.

Тағы шуныһы үҙенсәлекле: бөгөн “Биатлон” спорт-һауыҡтырыу үҙә­генә өлкән быуын вәкилдәре лә, йәштәр ҙә бик күп килгәйне. “Үҙем спортсы булмаһам да, бөгөнгө сараға бик теләп килдем, сөнки ҡышҡы спорт төрҙәрен яратмаған, саңғыла йәки конькиҙа шыумаған кеше беҙҙә бик һирәктер. Чемпио­наттың баш ҡалабыҙҙа үткәрелеүе иһә үҙе бер мәртәбә”,  – тине баш ҡалабыҙҙың Дим биҫтәһенән килгән Даян Вәлиев. Шулай итеп, уның кеүек мәктәп уҡыусыларының, йәш быуын вәкилдәренең спортҡа, ти­мәк, сәләмәт тормош алып барыуға ынтылышы – ҡыуаныслы күренеш.

Спорт байрамына килгән ҡунаҡ­тар спортсылар менән аралашты, биатлон, саңғы ярыштары, конькиҙа шыуыу, хоккей, сноуборд, тау саңғыһы кеүек спорттың төрлө төрҙәрендә үҙен һынаны, күнекмә­ләрҙе, популяр башҡарыусы Элвин Грейҙың (Радик Юлъяҡшиндың) сығышын ҡараны. Был көндә спорт һөйөүселәр ғаиләләре менән “Биатлон” комплексына килде: 5 – 40 йәшлек  800-ҙән ашыу кеше саңғыла шыуҙы.

Биатлон буйынса Рәсәй берен­селегенә килгәндә, ул бөгөнгә тиклем дауам итте һәм  суперспринт, ҡатнаш эстафета, масстарт буйынса еңеүселәр асыҡланды.

Айһылыу НИЗАМОВА