Бөтә яңылыҡтар
Спорт һәм туризм
17 Февраль 2023, 12:29

Инвесторҙарға тәҡдим әйтелде

Ул Өфө ҡалаһының Дим биҫтәһе менән бәйле.

pravitelstvorb.ru
Фото:pravitelstvorb.ru

Башҡортостан Республикаһының Үҫеш корпорацияһы инвесторҙарға Өфө ҡалаһының Дим биҫтәһендә физкультура-һауыҡтырыу үҙәген булдырыуҙы күҙаллаған яңы тәҡдим әйтте. Инвестор проектты ҡала хакимиәте менән концессия килешеүен төҙөгәндән һуң тормошҡа ашыра ала.

– Физкультура-һауыҡтырыу комплексын урынлаштырыу өсөн ике майҙансыҡ тәҡдим ителгән. Беренсеһенең дөйөм майҙаны – 7200 квадрат метр һәм боҙ арена­һы, көрәш залдары, тренажерҙар, мини-футбол һәм баскетбол күнекмәләре өсөн залдар булған ике ҡатлы төҙөлөштө күҙаллай. Иҫәпләүҙәргә ҡарағанда, проект бюджеты 613,2 миллион һум тәшкил итә. Икенсе майҙанда инвестор дөйөм майҙаны 3035 квадрат метр тәшкил иткән, көрәш, өҫтәл теннисы, шулай уҡ трена­жерҙар һәм универсаль спорт залдары булған физкультура-һауыҡ­тырыу комплексын төҙөй ала. Был осраҡта проект бюджеты 213,7 миллион һум тәшкил итәсәк, – тип белдерҙе Башҡортостан Респуб­ликаһының Үҫеш корпорацияһы генераль директоры Наил Ғәб­бәсов.

Концессия килешеүе шарттары буйынса, Өфө ҡалаһы хакимиә­тенә ҡараған ер биләмәһе инвес­торға ҡуртымға аҙаҡ килем алыу өсөн физкультура-һауыҡ­тырыу үҙәген төҙөү йәки үҙгәртеп ҡороу өсөн бирелә.

Әйткәндәй, быға тиклем Үҫеш корпорацияһы Өфөнөң төрлө ра­йон­дарында физкультура-һауыҡ­тырыу үҙәктәрен үҙгәртеп ҡороуҙы йәки төҙөүҙе күҙаллаған алты инвестиция проекты менән таныш­тырғайны.

Айһылыу НИЗАМОВА

Читайте нас: