Павловкаға килегеҙ

25-26 мартта “Павловка саңғы юлы” тип исемләнгән һигеҙенсе ғаилә фестивале үткәрелә.

Павловка паркына йәнә саңғы шыуырға яратҡан, сноубордингты, скиджорингты үҙ иткән спортсылар һәм спорт һөйөүселәр йыйыласаҡ.

Павловка саңғы юлы – һәр ва­ҡыт бик яҡшы итеп әҙерләнгән, үҙебеҙҙең ерлектә ойошторолған ярыштар. Иң мөһиме был – ғаилә, спорт һәм сәләмәтлек байрамы. Ун­да төрлө арауыҡҡа ҡаралған уҙыштар, уйындар һәм оҫталыҡ дәрестәре үткәрелә. Шуға был сарала ҡатнашырға телә­гәндәр Нуриман районына килә, ун­дағы тәби­ғәт менән һоҡлана, Павловка һыу һаҡлағысы эргәһендә саң­ғы шыуа ала. Ярыштарҙа ҡатнашыу­сылар өсөн бына тигән трассалар әҙер­ләнгән. Көйәрмәндәрҙе лә шәп бү­ләктәр уйнатылған конкурстар, музыкаль бүләктәр көтә.

Ярыштар программаһы:

* 5, 10 һәм 25 километр арауыҡҡа саңғы уҙыштары;

* балалар араһында саңғы старттары;

* скиджоринг (эттәр егеп уҙышыу);

* слалом: сноуборд һәм тау саңғыһы;

* биатлон буйынса оҫталыҡ дәрестәре.

Айһылыу НИЗАМОВА