Тәүге “ҡарлуғастар” – баш ҡалала

Башҡортостан Башлығы Радий Хәбиров социаль селтәрҙә “Мәктәп туризмы” программаһында ҡатнашыусыларҙың тәүге төркөмөн баш ҡаланың ихлас ҡаршылауын белдерҙе.   

“Башҡортостан буйлап сәйәхәт итәбеҙ! Стәрлетамаҡ районынан 45 бала бөгөн Өфөгә экскурсияға килде. Улар – 2023 йылда “Мәктәп туризмы” программаһының тәүге ҡатнашыусылары.

Балалар өсөн Өфө һәм Башҡортостан тарихына, республиканы данлаған билдәле кешеләргә арналған махсус тарихи-патриотик маршрут әҙерләнде. Сәйәхәт Совет майҙанынан һәм легендар генерал Миңлеғәле Шайморатов һәйкәленән башланды.

“Мәктәп туризмы “ – федераль программа. Былтыр беҙ пилот төбәге булдыҡ, яҡшы һөҙөмтә күрһәттек. 2023 йылда федераль бюджеттан күберәк аҡса алдыҡ – 188,7 миллион һум. Тағы ла 75,5 миллион һум  – республика бюджетынан.  

Һөҙөмтәлә йыл аҙағына тиклем төбәк буйынса сәйәхәткә 38 меңгә яҡын  5-9-сы класс уҡыусыларын йәлеп итә алабыҙ.

Беҙҙең республика  – мауыҡтырғыс тарихи һәм архитектура ҡомартҡылары, бай һәм төрлө тәбиғәте, тау, дала һәм урмандары булған ҙур төбәк. Барлыҡ ата-әсә лә балалары менән сәйәхәткә сығып китә алмай, мәҫәлән, Хәйбулла районынан Белоретҡа йәки Балаҡатайҙан Өфөгә.

“Мәктәп туризмы” бындай мөмкинлекте бирә. Туҡланыу, йәшәү, экскурсиялар, оҫталыҡ дәрестәре – быларҙың барыһы ла сәйәхәткә инә, ата-әсә өсөн бөтөнләй бушлай. Бына тигән проект, ул балаларыбыҙға Башҡортостанды күберәк белергә ярҙам итәсәк.

Фото: VK.com.