Нефтекамала йөҙөү бассейны һәм уйын залы менән «Амфибия» спорт үҙәген, шулай уҡ «БАЛ» универсаль спорт комплексын һәм Өфөлә «ФИЗРА-Д» һәм «ФИЗРА-Р» исемле ике физкультура-һауыҡтырыу комплексын төҙөүгә Башҡортостан 748 миллион һум күләмендә федераль субсидия алды. Бынан тыш, был проекттарға уларҙың республика бюджетынан 142,5 миллион һум йүнәлтеләсәк, ә тағы ла 485 миллион һум бюджеттан тыш инвестициялар тәшкил итәсәк. Билдәләп үтәйек, Башҡортостан «бизнес-спринт» программаһын тормошҡа ашырыуға ҡаралған күләмдең иң ҙур өлөшөн алды.
- Рәсәй Спорт министрлығына, шәхсән һеҙгә Олег Васильевич, ошо программа өсөн рәхмәт белдерәм. Беҙ унда әүҙем ҡатнашабыҙ һәм «бизнес-спринт»бюджетының дүрттән бер өлөшөн алдыҡ. Артабан да федераль ҡушма финанслауға ғариза бирергә планлаштырабыҙ. Шуға күрә, Олег Васильевич, беҙгә ярҙам итеүегеҙҙе һорайым, - тине Радий Хәбиров. - Башҡортостан - спорт төбәге. Беҙ яңы объекттарҙы ваҡытында тапшырасаҡбыҙ.
Бизнес-спринт федераль проекты Рәсәй Хөкүмәтенең 42 стратегик инициативаһы составына инә. Уның маҡсаты - ил халҡын заманса спорт объекттары менән тәьмин итеү.
- Башҡортостанда спортты үҫтереүгә һәм төбәк халҡын физик культура менән шөғөлләнеүгә йәлеп итеүгә ҙур иғтибар бүленә. «Бизнес-спринт» проекты сиктәрендә төҙөлгән яңы объекттар күп физкультурасылар өсөн йорт һәм спорт һәләттәрен асыу майҙансығы буласаҡ, тип ышанам. Республика халҡы өсөн спорт тормош нормаһына әйләнһен, – тип һыҙыҡ өҫтөнә алды Олег Матыцин.
