Беренсе көн кемдәргә еңеү килтерҙе?

24 июлдә, “Беҙ бергә. Спорт” йәйге Сурдлимпия уйындарын асҡан көндә, Өфөләге спорт майҙансыҡтарында биш спорт төрө - гандбол, спорт ориентирлауы, боулинг, грек-рим көрәше һәм баскетбол буйынса ярыштар үткәрелде.

Спорт ориентирлауының кросс-спринты буйынса ярыштар Рәсәй командаһына миҙалдар килтерҙе. Ҡатын-ҡыҙҙар араһында үткәрелгән сараларҙа Мария Новикова – беренсе, Антонина Найденова – икенсе, Ирина Лапикус өсөнсө урын яуланы. Ир-егеттәр араһындағы ярыштарҙа Никита Смирнов – алтын, Владимир Гринин – көмөш, Никита Асоян көмөш миҙалға лайыҡ булды.

Ир-егеттәр командалары араһындағы гандбол буйынса турнирҙа ике матч үткәрелде. Кения Үзбәкстан командаһын 51:24 иҫәбе менән еңде. Рәсәй-1 һәм Рәсәй-2 командалары араһындағы икенсе матчта беренсе команда спортсыларына уңыш йылмайҙы. Иҫәп 32:24 булды.

Боулинг буйынса ярыштарҙа Рәсәй командаһы вәкилдәре Арсен Акопян, Алексей Дрожбин һәм  Алексей Савченко алдынғы урындарҙы үҙ-ара бүлеште.

Грек-рим көрәшендә алдан үткәрелгән һәм ярымфинал ярыштары уҙғарылды.

Баскетбол буйынса ҡатын-ҡыҙҙар командалары араһындағы матчта Рәсәй-1 командаһы 105:35 иҫәбе менән Рәсәй-2 командаһын еңде.

Бөгөн каратэ, еңел атлетика, баскетбол, йөҙөү, теннис, волейбол, ганбол, грек-рим көрәше, спорт ориентирлауы, шоссе велосипед спорты һәм боулинг буйынса ярыштар үткәрелә.

“Беҙ бергә. Спорт” йәйге Сурдлимпия уйындары 23 июлдә башланды һәм 2 авгусҡа тиклем дауам итә. Ярыштар барасаҡ 10 көндә 1500-ҙән ашыу спортсы Өфөләге 18 спорт майҙансығында 21 спорт төрө буйынса миҙалдар өсөн көрәшәсәк. Уйындарҙа донъялағы 30 илдән, шул иҫәптән Франциянан, Төркиәнән, Белоруссиянан, Ҡаҙағстандан, АҠШ-тан, Испаниянан, Израилдән, Кениянан, Бахрейндан, Ирандан, Ираҡтан, Вьетнамдан һәм башҡа илдәрҙән судлимпиясылар ҡатнаша. Уларҙың барыһына ла уңыштар теләйбеҙ!

Фотолар: автор, vk.com/myvmestesport_ufa