Башҡортостанды килеп күрегеҙ!

Башҡортостан Хөкүмәте Премьер-министры Андрей Назаров социаль селтәрҙә пост ҡалдырҙы. Ул эске туризмды үҫтереүгә арналды. 

“Йәй үҙ хоҡуҡтарына инде, отпускылар осоро башланды. Республикабыҙ халҡы һәм ҡунаҡтары был ваҡытты Башҡортостан ерендә матур итеп үткәрһен өсөн, Р.Ф. Хәбиров ҡушыуы буйынса беҙ беренсе йыл ғына эске туризмды үҫтермәйбеҙ. Эш барышында өлгәшелгәндәр менән уртаҡлашҡым килә.

Яңыраҡ Петербург халыҡ-ара иҡтисади форумында Башҡортостан тармаҡты үҫтереүгә йүнәлтелгән бер нисә килешеү төҙөнө. Уларҙың береһе “Түләү карталарының милли системаһы” акционерҙар йәмғиәте менән ҡул ҡуйылған һәм милли түләү ҡоралдарын, атап әйткәндә, “Мир” банк картаһын файҙаланып, “Башҡортостан Республикаһы туризмы картаһы”н булдырыуҙы күҙ уңында тота. “Рәсәй” банкы һәм “Ирбис – БР” яғыулыҡ компанияһы менән берлектә юл буйы сервисын үҫтереү буйынса инвестиция проектын башлайбыҙ. Уның сиктәрендә дөйөм һалынған аҡса күләме 1,5 миллиард һумдан ашыу тәшкил иткән автозаправка станциялары селтәрен төҙөү планлаштырыла. Эшҡыуарҙар менән партнерлыҡта оҙайлы сроклы нигеҙҙә беҙҙең республика буйлап маршруттарҙы үҫтереү һәм уның тарихи һәм мәҙәни мираҫ объекттарына ҡыҙыҡһыныуҙы арттырыу менән шөғөлләнәсәкбеҙ.

Эске туризм – иҡтисадтың бюджетты һиҙелерлек тулыландыра алырлыҡ мөһим өлөшө. Һәм Башҡортостанға сәйәхәтселәрҙең иғтибарын йәлеп итерлек һәм тотоп ҡалырлыҡ нәмәләр байтаҡ. Әммә башҡараһы эштәр күп әле. Был тармаҡтағы үҫеш перспективаларын тикшереп, уның бер нисә төп векторы тураһында һөйләргә теләйем.

1. Туристик инфраструктураны үҫтереү. Бына бер нисә йыл инде юл буйы сервисын үҫтереүгә айырым иғтибар бүләбеҙ. Төбәккә килгән туристар өсөн туҡтау уңайлы, тәмле ашау-эсеү һәм ҡуныу урындары артырға тейеш. Бының өсөн, атап әйткәндә, глэмпингтар һанын арттырыу өҫтөндә әүҙем эшләйбеҙ. Бөгөн улар йөҙгә яҡын, ә 2020 йылда бөтә төбәккә ни бары бишәү ине. Шулай уҡ отелдәрҙә һәм туҡланыу нөктәләрендә сервисты даими яҡшыртабыҙ, күп кенә туристик объекттарҙа гидтар хеҙмәте күрһәтелә, экскурсиялар төрлөсә һәм ҡыҙыҡлыраҡ була бара.
2. Тарихи туризм. Башҡортостанда һәм Өфөлә тәбиғәт матурлығынан тыш, башҡа ҡарар нәмә юҡ тип белдергән кешеләр менән ҡәтғи килешмәйем. Беҙҙә үҙенсәлекле һәм ғәҙәти булмаған тарих. Бәлки, ул әҙерәк өйрәнелгәндер һәм популярлашҡандыр, әммә ул бик ҡыҙыҡлы. 2022 йылда Шүлгәнташ мәмерйәһе янында ошо уҡ исемдәге музей комплексын төҙөнөк. Шуға күрә уға килеүселәрҙең һаны шунда уҡ 2,3 тапҡырға тиерлек артҡан. Тиҙҙән Шишмә районында Күсмә цивилизациялар музейын асабыҙ. Ул республикабыҙ ҡунаҡтарын йәлеп итеүсе тағы ла бер үҙәккә әүерелер, тип ышанам.
3. Ваҡиғалы туризм. Һуңғы йылдарҙа Башҡортостанда унан ситтә лә ҡыҙыҡһыныу тыуҙырған бер нисә сара үтте. Улар – күптән түгел генә тамамланған “Китап байрамы” фестивале, “Евразия йөрәге” халыҡ-ара музыка фестивале, шулай уҡ бик күп сәйәси, иҡтисади һәм спорт форумдары. Район байрамдарын да оноторға ярамай. Мәҫәлән, күп кенә ғаиләләр һабантуй үткәреү өсөн үҙҙәренең бәләкәй ватанында йыйыла.
4. Шифахана-курорт һәм тәбиғәт өҫтөнлөктәре. Республика тураһында һөйләгәндә, унда булғандар менән аралашҡанда, күптәр шунда уҡ беҙҙең иҫ киткес шифаханаларҙы – Рәсәйҙә иң яҡшыларҙың береһен – иҫенә төшөрә. Беҙ артабан да уларҙың популярлығын һәм билдәлелеген арттырырға планлаштырабыҙ. Йәнә беҙҙең потенциал – “Янғантау” һәм “Тротау” геопарктары.

Бөгөн меңдәрсә рәсәйле беҙгә Башҡортостандың үҙенсәлекле тәбиғәте менән һоҡланырға, милли аш-һыуҙан ауыҙ итергә, бай тарихыбыҙҙы белер өсөн килергә әҙер. Әммә республикала туризм тармағы үҫешеүен дауам итһен өсөн, әле күп эштәр башҡарырға кәрәк. Үҙебеҙҙе ҡунаҡсыл хужалар итеп күрһәтер өсөн бар көсөбөҙҙө һаласаҡбыҙ. Рәхим итегеҙ”, – тип яҙҙы ул һәм Башҡортостан буйлап сәйәхәт итер өсөн яратҡан урындар фотоһын һалыуҙы һораны.

Фото: А. Назаровтың "Бәйләнештә"ге сәхифәһенән.