"Тәгәрмәс" ҡатнашыусыларын көтә!

14 июлдә Өфөнөң Ағиҙел яры майҙанында "Тәгәрмәс" фестивале үтә. Унда балалар араһында велосипедта уҙышыу, оҫталыҡ һабаҡтары, ижади сығыштар, яҙыусылар менән осрашыу, кино һәм дискотека ҡаралған. Программа көндөҙгө сәғәт 5-тә велофестивалдән башлана, ул алты майҙансыҡты эсенә ала: теркәлеү урыны, фотозона һәм дүрт төп ярыш майҙаны.

Ярышта 2-нән 16-ға тиклем йәштәгеләр ҡатнаша ала. Мөһим талап - башҡа мотлаҡ шлем кейергә кәрәк.
Фестивалдә төрлө концерт номерҙары ла ҡаралған, ә иң бәләкәс китап һөйөүселәрҙе "Китап" нәшриәтенең сауҙа нөктәһе ҡаршылар. Бында өҫтәл уйындарын да, сағыу һәм ҡыҙыҡлы баҫмаларҙы ла һатып алырға мөмкин була. Ҡайһы бер авторҙар кескәйҙәр менән осрашыуға ла килә.

 

Бынан тыш, балалар һәм үҫмерҙәр, ата-әсәләр, ғөмүмән, бар тамашасылар Өфө дизайнерҙарының яңы кейем коллекциялары менән таныша ала. Фестиваль "Дарман проекты" дискотекаһы менән тамамлана.

Ялдарын ғаилә менән бергә, матур һәм ҡыҙыҡлы итеп үткәрергә теләүселәр байрамға килеп, сағыу тәьҫораттар алып ҡайта ала.

Һүрәт: kulturaufa.ru сайтынан.