Спорт залы бикле тора...

6 ноябрҙә Балаҡатай районына эш сәфәре барышында Башҡортостан Башлығы Радий Хәбиров Яңы Балаҡатай ауылындағы балалар-үҫмерҙәр спорт мәктәбендә булды.

Учреждениела алты йәштән 18 йәшкә тиклемге 570-тән ашыу бала шөғөлләнә. Бында баскетбол, волейбол, гер спорты, бокс, көрәш, еңел атлетика, футбол һәм башҡа секциялар эшләй. Шулай уҡ балалар-үҫмерҙәр спорт мәктәбе бинаһында район күләмендәге спорт ярыштары, күмәк саралар үтә.

Ике ҡатлы бинаның беренсе ҡатында – фойе, гимнастика залы һәм кейем алмаштырыу бүлмәләре, икенсе ҡатта административ биналар һәм тренажер залы урынлашҡан. Бынан тыш, бинаға ангар тибындағы спорт залы төкәтеп һалынған була. Ул, иҫкереү сәбәпле, 2023 йылдың декабрендә ябыла.

Балаҡатай районының мәғариф бүлеге начальнигы Зөлфирә Ғилманова аныҡлауынса, балалар-үҫмерҙәр спорт мәктәбе бинаһы 1998 йылда төҙөлгән. Шул ваҡыттан алып бында ғәҙәттәге ремонт эштәре генә башҡарылған. Башҡортостан Башлығы ҡушыуы буйынса муниципалитетта яңы физкультура-һауыҡтырыу комплексы төҙөү өсөн ер участкаһы билдәләнгән. Район хакимиәте проект-эҙләнеү эштәрен үткәреү өсөн документтар әҙерләй башлаған ла инде.

Радий Хәбиров балалар-үҫмерҙәр спорт мәктәбе биналарын ҡараны, тәрбиәләнеүселәр һәм тренерҙар менән аралашты. Бокс һәм көрәш секцияларында шөғөлләнеүсе йәш спортсылар төбәк Башлығына үҙҙәренең ҡаҙаныштары тураһында һөйләне. Республика етәксеһе уҡытыусыларға 2025 йылда “Ауыл тренеры” грант конкурсында ҡатнашырға тәҡдим итте, шулай уҡ хоккей майҙансығын яңыртырға ҡушты.

Яңы физкультура-һауыҡтырыу комплексы төҙөлөшө өсөн һайланған майҙансыҡта Радий Хәбиров объектты 2025 йылда төҙөй башларға ниәтләүҙәре хаҡында хәбәр итте.

– Балаҡатай районында 18 мең кеше йәшәй, ә спорт залы бикле тора. Был хәлде төҙәтәсәкбеҙ. Шуға күрә тиҙ арала төҙөлә торған комплекс күтәрергә булдыҡ, – тине Радий Хәбиров. – Балаларыбыҙҙың спортҡа ынтылышы ҙур, дөйөм алғанда, ул йәмғиәттә лә популяр була бара.

Фото: Башҡортостан Башлығы сайты.