Андрей НАЗАРОВ: “Чемпиондар үҫеп килгән быуынға өлгө”

Әлеге ярыштар тураһында Башҡортостан Хөкүмәте Премьер-министры Андрей Назаров үҙенең социаль селтәрҙәрҙәге сәхифәһендә фекере менән уртаҡлашҡан.

“Илдең спорт әүҙемлектәре өсөн Башҡортостандың йәлеп итеү урынына әүерелеүе ҡыуандыра. Бөгөн билдәле ғалим һәм педагог Төхвәт Аслаевтың иҫтәлегенә бағышланған бокс буйынса республика универсиадаһына старт бирҙеләр. Уның улы Сәғит Аслаев күп йылдар Башҡортостандың Бокс федерацияһына уңышлы етәкселек итте, исемдәре республика һәм ил тарихына алтын хәрефтәр менән яҙылған спортсылар тәрбиәләне.

Арттырып әйтмәйем, беҙҙә Рәсәйҙә иң көслө бокс мәктәптәренең береһе. Илдең йыйылма командаһы составында - 14 спортсыбыҙ. 2024 йылда республиканың 58 боксеры спорт мастерлығына кандидат разрядын үтәгән. Республикала йәмғеһе 9 меңдән ашыу кеше бокс менән шөғөлләнә.

Беҙ был хаҡта һөйләүҙән туҡтамаҫбыҙ, чемпиондарыбыҙ менән ғорурланабыҙ. Улар - Азалия Әминева, Юлия Чумгалакова, Артур Собханғолов, Данис Ғабдрафиҡов, Надежда Голубева, Мария Казакова, Бекхан Исраилов һәм башҡалар.

Башҡортостан - бик күп кадрҙар әҙерләү урыны, шул иҫәптән спорт өлкәһендә лә. Бөтә эш беҙҙең мәктәптең көсөндә, РФ һәм БР Бокс федерацияһының профессиональ эшендә, тип уйлайым. Чемпиондарҙың үҫеп килгән спортсыларға өлгө булып тороуы - өҙлөкһөҙ процесс ул.

Илдә тәүгеләрҙән булып Боксты үҫтереү үҙәге төҙөлөшөн тамамланыҡ, Көрәш һарайы астыҡ. Уның базаһында абруйлы ярыштар ойошторасаҡбыҙ, бокс менән шөғөлләнеүҙе дәртләндерәсәкбеҙ һәм популярлаштырасаҡбыҙ, спортты үҫтерәсәкбеҙ.

Ә бокс буйынса Универсиадала ҡатнашыусыларға ҡыҙыҡлы уйындар, еңеүҙәр һәм сағыу тәьҫораттар теләйем!” – тип яҙа Андрей Назаров.

Фотолар Андрей Назаровтың сәхифәһенән алынды.