Өфөлә Йондоҙҙар матчы үтте

24 ғинуарҙа Өфөлә Башҡортостан Башлығы Радий Хәбиров республиканың баш ҡалаһына килгән олимпия чемпиондары менән бергә яңы Көрәш һарайы майҙансығында үткән Студенттар баскетболы ассоциацияһының Йондоҙҙар матчында булды.

Уйындар “Көнсығыш” һәм “Көнбайыш” ир-егеттәр һәм ҡатын-ҡыҙҙар йыйылма командалары араһында үтте. Ярышта ҡатнашыусыларҙы Студент баскетболы ассоциацияһы 2024/2025 йылдар миҙгелендә сығыш яһау, шулай уҡ көйәрмәндәрҙең тауыш биреү һөҙөмтәләре буйынса һайлаған. Финал составын капитандар билдәләгән.

Ярыштар ир-егеттәр коллективтары араһындағы матчта 113:107 иҫәбе менән һәм ҡатын-ҡыҙҙар араһында 97:96 иҫәбе менән “Көнсығыш” йыйылма командаһының еңеүе менән тамамланды.

Журналистар менән әңгәмәлә төбәк етәксеһе, Көрәш һарайы был көндө 3,5 меңдән ашыу баскетбол һөйөүсене йыйҙы, тип билдәләне.

 – Беҙ был объектты төрлө - спорт сараларынан алып мәҙәни һәм хатта сәйәси - саралар үткәреү өсөн төҙөнөк, – тип һыҙыҡ өҫтөнә алды Радий Хәбиров. - Олимпия чемпиондарының килеүе, улар араһында баскетбол легендаһы Иван Едешконың булыуы, һис шикһеҙ, студент баскетболының бәҫен күтәрә. Был спорт төрөн үҫтерәсәкбеҙ һәм иң юғары кимәлдәге турнирҙар үткәрергә ынтыласаҡбыҙ.

Белешмә:

Студент баскетболы ассоциацияһы (АСБ) 71 төбәктән 800-ҙән ашыу команданы берләштерә, йыл һайын 5 меңдән ашыу матч үткәрелә. Ойошманың төп маҡсаты – мөмкин тиклем күберәк студенттарҙы даими спорт менән шөғөлләнеүгә йәлеп итеү.

 АСБ чемпионаты октябрҙән июнгә тиклем ике этапта үтә. Беренсе этап - дивизиональ. Икенсеһе - Белов лигаһы - 32 иң яҡшы ир-егеттәр һәм ҡатын-ҡыҙҙар командаһы ҡатнашлығында үткән Бөтә Рәсәй плей-офы.

Республикала баскетбол үҫеше өсөн “Башҡортостан баскетбол федерацияһы” төбәк йәмәғәт ойошмаһы яуаплы. Физкультура-спорт ойошмаларында 60 баскетбол бүлеге эшләй, унда 5 946 бала шөғөлләнә һәм 165 тренер уҡыта. Мәктәп баскетбол лигалары чемпионаттары 1 127 уҡыу йортон һәм 140 меңдән ашыу йәш спортсыны үҙ эсенә ала.

Мәғлүмәт һәм фото: https://glavarb.ru/rus/press_serv/novosti/189337.html