Бөтә яңылыҡтар
10
Спорт һәм туризм
14 Февраль , 19:00

"Һеҙ бүләк иткән хис-тойғолар өсөн рәхмәт!"

Үткәреү урыны тип Өфө, Әбйәлил, Ишембай һайланды. 

"Һеҙ бүләк иткән хис-тойғолар өсөн рәхмәт!"
"Һеҙ бүләк иткән хис-тойғолар өсөн рәхмәт!"

Бөтә Рәсәй “Беҙ бергә. Спорт” һаңғырауҙар спорты ҡышҡы спартакиадаһы 6 – 16 февралдә Өфөлә, Ишембайҙа һәм Әбйәлил районында булды. 30-ҙан ашыу төбәктән  800-ҙән ашыу ҡатнашыусы ете спорт дисциплинаһы – тау саңғыһы һәм саңғы ярыштарында, сноуборд, шахмат, хоккей, кёрлинг һәм футзал буйынса ярышты. Башҡортостан исеменән 27 атлет сығыш яһаны.

Башҡортостан Башлығы Радий Хәбиров үҙенең сығышында республиканың һаңғырауҙар спортының төрлө ярыштарын үткәрергә әҙер икәнлеген белдерҙе.

- Ысын спорт көрәше, дуҫлыҡ, бер-береңә булған хөрмәттән торған ике аҙна тамамлана. Һеҙ бүләк иткән хис-тойғолар өсөн рәхмәт! Һеҙҙән ҙур спортсылар яһаған тренерҙарға ҙур рәхмәт. Ярыштар ваҡытында һеҙгә уңайлы булһын тип тырыштыҡ, республикабыҙҙың иң яҡшы спорт объекттарын бирҙек, - тине төбәк етәксеһе. – Был ярыштар тамамлана, ә Башҡортостан көҙ буласаҡ БДБ илдәренең һаулыҡ мөмкинлектәре сикләнгән балалары араһында Беренсе ҡышҡы спартакиадаға әҙерлекте башлай. Барлыҡ спортсыларға алға барырға, көслөрәк булырға теләйбеҙ.

Республика етәксеһе Башҡортостандың дәүләт наградаларын тапшырҙы.

Рәсәй спорт министрының беренсе урынбаҫары Одес Байсолтанов сараны әҙерләүҙең һәм үткәреүҙең юғары кимәлдә булыуын белдерҙе. Бөтә Рәсәй Һаңғырауҙар спорты федерацияһы президенты Дмитрий Ребров Башҡортостан етәкселегенә ярыштарҙы үткәргән өсөн рәхмәт әйтте.

Журналистар менән аралашҡанда Радий Хәбиров Башҡортстандың йәнә илдәге алдынғы спорт төбәктәренең икәнлеген раҫланы.

- Беҙ беренсе йәйге Сурдлимпия уйындарын үткәрҙек, әле – ҡышҡы уйындарҙы. Бөгөн Рәсәйҙең спорт министрынан БДБ илдәренең һаулыҡ мөмкинлектәре сикләнгән балалары араһында Беренсе ҡышҡы спартакиаданы беҙҙә үткәреүгә ризалыҡ яҙылған хатты алдыҡ. Был спорт байрамы, ҙур халыҡ-ара сара буласаҡ. Мин һәр ваҡыт беҙҙә ҙур ярыштарҙың үткәрелеүе яҡлымын. Беренсенән, спортсылар өсөн яҡшы. Икенсенән, иҡтисад эшләй – барлыҡ ҡунаҡханалар, ресторандар, музейҙар халыҡ менән тулы була, транспорт эшләй, - тине Радий Хәбиров. – Күптән түгел мин Рәсәй спорт министры менән осраштым. Был тема тураһында һөйләштек. Быға тиклем, объекттар етешмәү сәбәпле, ҡайһы бер ярыштарҙы үткәрә алмаһаҡ, хәҙер йыл һайын спорт инфраструктураһын яҡшыртабыҙ. Еңел атлетика манежын төҙөү өҫтөндә әүҙем эшләйбеҙ. Был ҡатмарлы мәсьәлә буласаҡ – бюджет, яҡшы проект өсөн көрәш. Уны төҙөүе еңел булмаясаҡ.

Сығанаҡ: https://glavarb.ru/ru/news/event/v-ufe-sostoyalas-ceremoniya-zakrytiya-vserossiyskoy-zimney-spartakiady-sredi-gluhih-my-vmeste-sport-72431/

Автор:Айһылыу Низамова
Читайте нас: