Хеҙмәт урынында ниңә физик күнекмәләр эшләргә кәрәк?

Спорт, физик күнекмәләр эштә күберәк һөҙөмтәләргә өлгәшергә булышлыҡ итә. Әйткәндәй, был хаҡта балалар баҡсаһында тәрбиәселәр – бәләкәстәргә, артабан мәктәптә уҡытыусылар - уҡыусыларға, һуңынан урта һәм юғары белем биреү йортонда студенттарға өйрәтә башлайҙар.

Предприятиеларҙа гимнастика эшләйҙәр

“Хеҙмәт резервтары” Бөтә Рәсәй физкультура-спорт йәмғиәтенең республикалағы йәмғиәте тарафынан хеҙмәтсәндәрҙе күмәк кеше ҡатнашҡан ярыштарға йәлеп итеү, физкультура-спорт клубтарын асыу, предприятиеларҙа производство гимнастикаһын эшләү һөҙөмтәһендә физик культура һәм спорт менән әүҙем шөғөлләнеүгә йәлеп итеү эше алып барыла. Башҡортостандың Сәнәғәт, энергетика һәм инновациялар министрлығы ярҙамында 25 яңы ошондай клуб барлыҡҡа килгән дә инде. Бынан тыш, 21 район һәм ҡала “Производство гимнастикаһы” комплексын тормошҡа ашыра. Улар араһында Әлшәй, Баҡалы, Бәләбәй, Белорет, Бөрө, Благовещен, Дәүләкән, Ҡариҙел, Стәрлетамаҡ райондары, Межгорье, Нефтекама, Октябрьский ҡалалары һәм башҡалар бар.

Башҡортостандың Сәнәғәт, энергетика һәм инновациялар министрлығы тарафынан ошо ведомствола ойошторолған һәм “Корпоратив спорт хеҙмәт етештереүсәнлеген арттырыу инструменты” тигән исем аҫтында үткән матбуғат сараһында һүҙ ошо хаҡта барҙы. Унда республиканың сәнәғәт, энергетика һәм инновациялар министры урынбаҫары Рөстәм Нәбиуллин, Башҡортостандың Спорт министрлығының бүлек етәксеһе Андрей Григорьев, “Хеҙмәт резервтары” Бөтә Рәсәй спорт-физкультура йәмғиәтенең төбәк бүлексәһе рәйесе Сергей Медведев, “Өфө моторҙар эшләү берекмәһе” яуаплылығы сикләнгән йәмғиәтенең бүлек начальнигы Лена Әхмәтова ҡатнашты.

Спикерҙар хәбәр итеүенсә, хеҙмәт урыныдағы спорт һөҙөмтәлелекте арттырыуға, хеҙмәтсәндәрҙең сәләмәтлеген нығытыуға булышлыҡ итә. “Хеҙмәт резервтары” йәмғиәтенең төбәкә бүлексәһе рәйесе Сергей Медведев ойошма тарафынан хеҙмәт кешеһен әүҙем спорт менән шөғөлләнеүгә йәлеп итеү буйынса планға ярашлы эш алып барылыуы – ярыштар үткәрелеүе, производство гимнастикаларының эшләнеүе тураһында һөйләне. 

Хатта Калининградҡа барҙылар

“Хеҙмәт резервтары” спартакиадаһының тәүге миҙгеле былтыр 30 марттан 15 июнгә тиклем үткәрелде. Биш этаптан торған ярыштарҙа республиканың алдынғы предприятиеларынан 15 хеҙмәт коллективы –  йәмғеһе 2500-ҙән ашыу кеше ҡатнашты. Улар йөҙөү, шашка, шахмат, дартс, еңел атлетика, баскетбол, футбол, волейбол, бильярд, гер күтәреү, керлинг, конькиҙа шыуыу, арҡан тартыу кеүек спорт төрҙәрендә үҙ көсөн һынаны. Ошо ярыштарҙа еңеү яулаған “Өфө моторҙар эшләү берекмәһе” командаһы Калининградта ойошторолған “Хеҙмәт резервтары” Бөтә Рәсәй йәйге корпоратив фестивалендә ҡатнашты.

1 мартта Башҡортостанда “Хеҙмәт резервтары” спартакиадаһы башлана һәм 17 майға тиклем дауам итә. Дүрт этаптан торған ярыштар 30 иң популяр спорт төрө буйынса ойошторола. Беренсе этапта командалар һигеҙ спорт төрө - йөҙөү, шашка, шахмат, нард, дартс, пневматик мылтыҡтан атыу, баскетбол һәм волейбол буйынса үҙ көсөн һынай. Ярыштар баш ҡаланың иң яңы спорт комплекстарында ойошторола.

ФЕКЕР

Рөстәм НӘБИУЛЛИН, республиканың сәнәғәт, энергетика һәм инновациялар министры урынбаҫары:

– Корпоратив спорт – предприятие тормошондағы етди мөһим әйберҙәрҙең береһе. Ул кешеләрҙең үҙ-ара хеҙмәттәшлек итеүе, психологик мөхит өсөн мөһим. Бер командала шөғөлләнгән кешеләрҙең производствола үҙҙәренә һәм башҡаларға ярҙам итеүе өсөн кәрәк. Етештереү процесы үҙе ярыш кеүек, шул иҫәптән көнәркәштәр менән дә. Өҫтәүенә физик һәм психологик сәләмәтлек хеҙмәт етештереүсәнлеген арттырырға булышлыҡ итә.

Андрей ГРИГОРЬЕВ, Башҡортостан Спорт министрлығының бүлек етәксеһе:

–  Корпоратив спорт – республиканың физик культура һәм спортынң айырылғыһыҙ өлөшө. 2030 йылға тиклем беҙ физик культура һәм спорт менән шөғөлләнеүселәр һанын 70 процентҡа тиклем арттырырға тейешбеҙ. Корпоратив спорт буйынса ла эштең алып барылыуы һөҙөмтәһендә был һанды арттырыуға өлгәштек.

ӘЙТКӘНДӘЙ

*Башҡортостанда корпоратив спортты үҫтереүгә булышлыҡ иткән Төнгө футбол лигаһы бар. Был сара спортты, сәләмәт тормош алып барыуҙы популярлаштырып ҡына ҡалмай, ә ойошмалар араһында корпоратив мәҙәниәтте лә нығыта. Лиганың төп принциптарының береһе – һөйәрмәндәр спортын һөнәри итмәү. Предприятие йәки ведомство командаһы өсөн саҡырылған профессионалдар түгел, тап уның хеҙмәткәрҙәре сығыш яһай.

Өфөлә Башҡортостанда хоккей лигаһы 2022 йылда ойошторолдо. Уның составында корпоратив хоккейсылар уйнай.

*Башҡортостанда даими рәүештә төрлө спорт объекттары асыла, булғандары сынъяһау ителә. Бынан тыш, Хеҙмәткә һәм оборонаға әҙерлек нормативтарын үтәү өсөн 56 спорт майҙансығы, ике асыҡ типтағы физкультура-һауыҡтырыу комплексы сафҡа инде, спортсылар әҙерләү менән шөғөлләнгән ойошмалар 402,7 миллион һумдан ашыу субсидия алды. Быларҙың барыһы ла корпоратив спортҡа ыңғай йоғонто яһай.

Автор фотоһы.