Бассейнлы физкультура-һауыҡтырыу комплексы асылды

Бөгөн,  4 августа, Благовещенда республика Башлығы Радий Хәбиров «Zarяд» бассейнлы физкультура-һауыҡтырыу комплексын асыуҙа ҡатнашты. Уны «Башнефть» акционерҙар нефть компанияһы ярҙамында «Роснефть» менән Башҡортостан араһындағы хеҙмәттәшлек тураһындағы килешеү сиктәрендә төҙөгәндәр.

Төҙөлөш  2022 йылда башланған. Спорт комплексында спорт төрҙәре һәм көрәш менән шөғөлләнеү өсөн залдар, тренажер залы, шулай уҡ 25 метрлыҡ дүрт юллы бассейн йыһазландырылған. Комплекс Благовещен районының балалар-үҫмерҙәр спорт мәктәбенә беркетеләсәк. Бында мини-футбол, волейбол, баскетбол, ҡул һуғышы, грэпплинг, панкратион, тхэквондо, йөҙөү буйынса дәрестәр үтәсәк.

Благовещен ҡалаһының 1-се гимназияһының «шайморатов» кластары уҡыусылары менән яңы комплекста самбо буйынса дәрестәр үткәреләсәк. Шулай уҡ физкультура-һауыҡтырыу комплексында махсус хәрби операцияла ҡатнашыусылар өсөн реабилитация программаларын һәм уларҙың ғаилә ағзалары өсөн спорт секцияларын ойоштороуҙы планлаштыралар.

Сәләмләү һүҙендә Радий Хәбиров Благовещен районына күптән ҙур спорт объекты кәрәк булыуын билдәләне.

 – «Башнефть» компанияһына ҡалаға ошондай йомарт бүләк өсөн рәхмәт белдерәм. Был Башҡортостанда бергәләп төҙөлгән тәүге һәм, ышанам, һуңғы социаль объект түгел. Благовещенда балаларҙың спорт менән шөғөлләнеүе бик шәп. Маҡсатыбыҙ – улар көслө, маҡсатлы шәхестәр булып үҫһен, ысын патриоттар сыныҡһын, – тине төбәк етәксеһе.

Радий Хәбиров шулай уҡ республиканың спорт мәктәптәре һәм учреждениелары тренерҙарына, етәкселәренә дәүләт наградаларын, Благовещен районы башлығы Анна Карабановаға физкультура-һауыҡтырыу хеҙмәттәренә сертификат та тапшырҙы. Уның буйынса ГТО нормаларын тапшырған оло йәштәге кешеләр бушлай спорт менән шөғөлләнә һәм бассейнға йөрөй аласаҡ. Ә Благовещен районының балалар-үҫмерҙәр спорт мәктәбе директоры Алексей Козлов Башҡортостан Башлығынан яңы «Газель Next» микроавтобусының асҡысын алды.

«Башнефть» компанияһы генераль директоры Владимир Чернов Благовещен халҡын физкультура-һауыҡтырыу комплексы асылыуы менән ҡотланы һәм уның өлкәндәр һәм балалар өсөн иң популяр спорт майҙансығы буласағына ышаныс белдерҙе. Благовещен районы хакимиәте башлығы Анна Карабанова билдәләүенсә, «Zarяд» физкультура-һауыҡтырыу комплексы ҡалала беренсе физкультура-һауыҡтырыу комплексы булып тора.

Шулай уҡ бөгөн «Zarяд» майҙансығында видеоконференция режимында Стәрлетамаҡта «Алға» физкультура-һауыҡтырыу комплексын төҙөү тантанаһы үтте. Объектты федераль саралар йәлеп итеп һәм дәүләт-шәхси партнерлыҡ механизмын файҙаланып «Бизнес-спринт» программаһы буйынса төҙөйҙәр. Уны 2027 йылдың декабрендә файҙаланыуға тапшырыу планлаштырыла.

- Буласаҡ «Алға» спорт комплексында бассейн, тренажер залы, теннис корты, көрәш, волейбол һәм футбол залдары күҙалланған. Республика етәкселегенә, Рәсәй Спорт министрлығына ҡала өсөн мөһим булған был проектты тормошҡа ашырыуҙа ярҙам иткәндәре өсөн рәхмәт, – тине Стәрлетамаҡ хакимиәте башлығы Эмиль Шәймәрҙәнов.

Тантаналы өлөштән һуң төбәк Башлығы «Zarяд» физкультура-һауыҡтырыу комплексының спорт инфраструктураһы менән танышты. Комплекстың беренсе ҡатындағы тренажер залында Радий Хәбиров ҡаланың өлкән йәштәге кешеләре менән аралашты. Улар ГТО нормаларын тапшырыу йомғаҡтары буйынса физкультура-һауыҡтырыу хеҙмәттәренә сертификат алды.

Төбәк етәксеһе спорт мәктәбе тәрбиәләнеүселәре өсөн оҫталыҡ дәрестәрендә лә булды. Спорт көрәше буйынса дәресте ҡатнаш көрәш көрәшсеһе, республиканың Дәүләт Йыйылышы – Ҡоролтай депутаты Джефф Монсон һәм махсус хәрби операцияла ҡатнашыусы Руслан Сафин үткәрҙе, йөҙөү буйынса күнекмәне Олимпия уйындары чемпионы, күп тапҡыр СССР чемпионы һәм рекордсмены Вениамин Таянович ойошторҙо.

Радий Хәбиров шулай уҡ баскетбол буйынса 3×3 «Ҡыҙғылт-һары туп» Бөтә Рәсәй ярыштары сиктәрендә «Динамо Юниор» командаһы менән Башҡортостандың юғары уҡыу йорттары студенттарының интернациональ йыйылма командаһы араһында иптәштәрсә матчҡа старт бирҙе.

Фото: glavarb.ru