Барыһы ла тигеҙ шарттарҙа эшләһен өсөн

Премьер-министр Андрей Назаров үткәргән Башҡортостан Хөкүмәте ултырышында урынлаштырыу сараларын, шул иҫәптән ҡунаҡханаларҙы, ял базаларын, кемпингтарҙы, шифаханаларҙы классификациялау мәсьәләһен тикшерҙеләр.

– Ҡунаҡсыллыҡ индустрияһын төрлө урынлаштырыу саралары тәшкил итә, улар был өлкәлә төп элемент булып тора. Атап әйткәндә, тәүге ярты йыллыҡта ҡунаҡханалар һәм махсус урынлаштырыу саралары йыллыҡ үҫеш 15 процентҡа артҡан 8,8 миллиард һумлыҡ хеҙмәттәр күрһәтте. Был туризм өлкәһендә түләүле хеҙмәттәрҙең дөйөм күләменең 83 процентын тәшкил итте, - тип белдерҙе Андрей Назаров.

Министрҙар кабинеты башлығы билдәләүенсә, ағымдағы йыл башынан алып урынлаштырыу саралары эшмәкәрлеген көйләүҙә етди үҙгәрештәр булды. Мәҫәлән, ҡунаҡханалар өсөн генә түгел, ә ял базалары, кемпингтар, шифаханалар өсөн дә мотлаҡ классификация индерелгән. Реформа 2025 йылдың 1 сентябренә тамамланырға тейеш һәм ике мәсьәләне хәл итеүгә йүнәлтелгән: баҙарҙа ҡатнашыусыларҙың эшенә тигеҙ шарттар булдырыу һәм туристарҙың урынлаштырыу сифатына ышанысын арттырыу.

Башҡортостан Республикаһының эшҡыуарлыҡ һәм туризм министры Светлана Верещагина урынлаштырыу сараларын классификациялау тураһында тулыраҡ мәғлүмәт бирҙе.

– 1 сентябрҙән һуң үҙ-үҙен баһаламаған бөтә урынлаштырыу саралары реестрҙа туҡтатыласаҡ һәм бронләү агрегаторҙары сайттарында хеҙмәттәр һата алмаясаҡ. Реестрҙағы яҙма урынлаштырыу сараһының мөһим атрибуты һәм бизнестың законлылығын раҫлау булып тора, - тип билдәләне Светлана Верещагина.

25 авгусҡа ҡарата реестрҙа Башҡортостандың 531 урынлаштырыу сараһы иҫәпләнә. Үҙ-үҙен баһалау процедураһын 340 объект үтә, был дөйөм һандың яҡынса 64 процентын тәшкил итә.

Классификация системаһын реформалау туристарҙың һайлау мөмкинлектәрен арттырыуға йүнәлтелгән, ә бизнес тигеҙ ғәҙел шарттарҙа эшләй. Быйыл тәүге тапҡыр туристик индустрия өлкәһендә, шул иҫәптән урынлаштырыу саралары эшмәкәрлегенә ҡарата контроль индерелде һәм төбәк кимәленә тапшырылды. Вәкәләттәр Эшҡыуарлыҡ һәм туризм министрлығына йөкмәтелә, уның составында туристик индустрия өлкәһендә контроль һәм күҙәтеү секторы булдырылған.

Министр даими рәүештә мәғлүмәт-консультация саралары үткәрелеүен һыҙыҡ өҫтөнә алды. Мәҫәлән, урынлаштырыу саралары хужаларына 500-ҙән ашыу белдереү ебәрелгән һәм 300-ҙән ашыу консультация үткәрелгән.

Кәңәшмә аҙағында Премьер-министр республиканың Матбуғат һәм киң мәғлүмәт саралары агентлығы менән берлектә Эшҡыуарлыҡ һәм туризм министрлығына ошо мәсьәлә буйынса мәғлүмәт кампанияһын дауам итергә, ә муниципалитет хакимиәттәренә урынлаштырыу саралары хужалары менән эште көсәйтергә һәм 1 сентябргә тиклем үҙ-үҙен баһалау процедураһын максималь үтеүҙе тәьмин итергә ҡушты.

Фото: Башҡортостан Хөкүмәте сайты.